Yevropaning nufuzli musobaqasi — UEFA Chempionlar Ligasi doirasida navbatdagi bosqichga yo‘l olgan "Arsenal" bosh murabbiyi Mikel Arteta «Bayer»ga qarshi uchrashuvdan keyin o‘z fikrlari bilan o‘rtoqlashdi.
Mutaxassisning ta’kidlashicha, jamoa o‘yinni juda faol va ishonchli boshlagan. Londonliklar maydonning deyarli barcha hududlarida xavfli vaziyatlar yaratib, raqibga bosim o‘tkazgan. Biroq raqib darvozabonining ishonchli harakatlari hisobni ochishni ancha kechiktirgan.
“Biz o‘yinni yuqori darajada boshladik, har bir chiziqda ustunlikka ega bo‘ldik. Raqib posboni ularni o‘yinda ushlab turdi. Oldinga chiqishimiz uchun Eberechi Ezening haqiqiy mahorat namoyishi kerak bo‘ldi”, — dedi Arteta.
Ikkinchi bo‘limda esa jamoa yanada ishonchli harakat qildi. Murabbiyning fikricha, Deklan Raysning faolligi va maydondagi ta’siri g‘alabani ta’minlashda hal qiluvchi omillardan biri bo‘lgan.
“Ikkinchi taymda Deklanning harakatlari bizga katta yordam berdi. Bizda uchinchi golni kiritish uchun yana bir nechta — to‘rt yoki beshta aniq imkoniyatlar bo‘ldi. Umuman olganda, bu g‘alaba to‘liq haqli va mehnatimiz samarasi bo‘ldi”, — deya qo‘shimcha qildi u.
Shu tariqa, «Arsenal» ishonchli o‘yini orqali chorak finalga yo‘l oldi va endilikda ularni yanada jiddiy sinov kutmoqda. Eslatib o‘tish joiz, londonliklar navbatdagi bosqichda "Sporting"ga qarshi bahs olib boradi.
Bu natija jamoaning hozirgi formasi yuqori ekanini va ular katta maqsadlar sari ishonch bilan intilayotganini yana bir bor tasdiqladi.
“Zamin”ni Telegramʻda oʻqing!
