“Barselona” klubi prezidenti Joan Laporta Chempionlar ligasi chorak finalida "Atletiko Madrid"ga qarshi o‘yinlardan keyin UYEFA rahbariyatiga bevosita murojaat qilgan. Bu haqda Mundo Deportivo nashri xabar tarqatdi.
Manbalarga ko‘ra, Laporta UYEFA prezidenti Aleksander Cheferin bilan telefon orqali bog‘lanib, uchrashuvlardagi hakamlik qarorlaridan qattiq noroziligini bildirgan.
Kataloniya klubi rahbari “Atletiko”ga qarshi ikki bahs (1:2, 2:0) davomida yuzaga kelgan ayrim bahsli epizodlar klub manfaatiga zid hal etilganini taʼkidlagan.
Shuningdek, javob uchrashuvi tanaffus paytida Laporta UYEFA bosh kotibi Teodor Teodoridis hamda uning yordamchisi Jorjo Marketti bilan shaxsan uchrashgani maʼlum qilindi. Ushbu muloqotda u bosh hakam Kleman Tyurpenning birinchi bo‘limdagi qarorlarini ham tanqid qilgan.
Xususan, Dani Olmoga nisbatan qoidalar buzilishi uchun penalti belgilanmagani, shuningdek Xuan Musso tomonidan Fermin Lopesga qarshi amalga oshirilgan epizod eʼtiborsiz qolgani asosiy eʼtirozlar qatorida keltirilgan.
Laporta yana birinchi uchrashuvni boshqargan Ishtvan Kovachning qarorlarini ham qayta-qayta tanqid qilgan.
Bundan tashqari, u UYEFAning “Barselona” tomonidan Mark Pubilning qo‘l bilan o‘ynagan vaziyati yuzasidan yuborilgan rasmiy shikoyatni qabul qilmaganini ham keskin norozilik bilan qayd etgan.
Hozircha UYEFA tomonidan bu bayonotlarga rasmiy javob berilmagan, ammo vaziyat Yevropa futbolida muhokamalarni yana-da qizitib yubormoqda.
“Zamin”ni Telegramʻda oʻqing!
