Vinisiusning goli «Real Madrid»ga «Alaves» ustidan g'alaba keltirdi
Vinisiusning golidan so'ng «Real Madrid» «Alaves» ustidan g'alaba qozondi. Bosh murabbiy Alvaro Arbelua, Vinisiusni og'ir sharoitda jamoaga muhim uch ochko olib kelgani uchun himoya qildi. Muxlislar o'yin boshida tanqid qilgan bo'lsa-da, Vinisius ikkinchi bo'limda uzoq masofadan gol urib, o'zini isbotladi. Ushbu g'alaba bilan «Real Madrid» turnir jadvalida «Barselona» bilan farqni olti ochkogacha qisqartirdi.
«Real Madrid» bosh murabbiyi Alvaro Arbeloa La Liga doirasida «Alaves» ustidan qozonilgan g'alabadan so'ng hujumchi Vinisius Juniorni himoya qilib chiqdi. Braziliyalik futbolchi «Santyago Bernabeu» stadionidagi og'ir muhitga qaramay, jamoasiga muhim uch ochkoni taqdim etgan gol muallifiga aylandi. Bu haqda Goal.com xabar beradi.
Chempionlar ligasidan chiqib ketganidan norozi bo'lgan muxlislar o'yin boshida Vinisius va uning jamoadoshlarini hushtakbozlik bilan kutib olishdi. Biroq hujumchi ikkinchi bo'limda uzoq masofadan aniq zarba yo'llab, tanqidchilarga munosib javob qaytardi.
Arbeloa uning ruhiy kuchi va qiyin vaziyatlarda mas'uliyatni o'z zimmasiga olishini yuqori baholadi.
Uchrashuv davomida yarim himoyachi Eduardo Kamavinga ham muxlislar bosimiga duch keldi. «Bavariya» bilan o'yinda maydondan chetlatilgan fransiyalik futbolchi zaxiradan maydonga tushganida muxlislar tomonidan norozilik bilan kutib olindi.
Murabbiy Kamavinganing ham mahorati va tajribasi tez orada yana namoyon bo'lishiga ishonch bildirdi.
«Real Madrid» ushbu g'alabadan so'ng turnir jadvalida «Barselona» bilan farqni olti ochkogacha qisqartirdi. O'yin davomida Kilian Mbappe ham o'z hisobiga gol yozdirib qo'ydi.
Biroq g'alaba yo'qotishlar bilan kechdi: himoyachi Eder Militao jarohat sababli birinchi bo'lim yakunlanmasdan maydonni tark etishga majbur bo'ldi.
Izohlar 0
…