Yevropa Chempionlar ligasining yarim final bosqichida qit'aning eng kuchli ikki jamoasi — «PSJ» va «Bavariya» o'zaro bahs olib boradi. Birinchi uchrashuv Parijdagi «Park de Prens» stadionida bo'lib o'tsa, javob o'yini Myunxenda o'tkaziladi. Bu haqda Goal.com xabar beradi.
Ushbu juftlik g'olibi Budapeshtda o'tadigan finalda «Arsenal» yoki «Atletiko» jamoalaridan biri bilan kuch sinashadi.
«Bavariya» tarkibida Jamal Mussiala o'zining eng yaxshi formasiga qaytgan va u jarohat olgan Serj Gnabri o'rnini egallashi kutilmoqda. Myunxenliklar safida Lennart Karl, Tom Bishof va Rafael Gerreyro kabi rotatsiya o'yinchilari ham safdan chiqqan.
Shunga qaramay, Alfonso Devis zaxiradan maydonga tushib, o'yin tempini o'zgartira oladigan eng xavfli qurol bo'lib qolmoqda.
«PSJ» bosh murabbiyi Luis Enrike tarkibdagi muammolar hal bo'lganini ma'lum qildi. Ashraf Hakimi, Nuno Mendesh va Vitinya kichik jarohatlardan so'ng mashg'ulotlarga qaytdi.
Shuningdek, tizzasidan jarohat olgan Fabian Ruiz ham safga qaytgan. Parijliklar zaxira o'rindig'ida Lukas Ernandes, Uorren Zaire-Emeri va Bredli Barkola kabi kuchli ijrochilar borligi Enrikega keng imkoniyatlar yaratadi.
Statistik ma'lumotlarga ko'ra, «Bavariya» ayni paytda Yevropaning eng samarali jamoasi bo'lib turibdi. Myunxenliklar har bir o'yinda o'rtacha 2,71 ochko jamg'armoqda.
Jamoaning hujumkor triosi — Maykl Olise, Luis Dias va Harri Kane barcha musobaqalarda jami 167 ta gol urishga erishdi. Kane yolg'iz o'zi 53 ta gol bilan «Oltin butsa» poygasida yaqqol peshqadamlik qilmoqda.
Parijliklar hujum chizig'ida esa Usmon Dembele va Xvicha Kvarashelia asosiy xavf manbai hisoblanadi, biroq ularning har biri joriy mavsumda 16 tadan gol urgan. Himoya borasida har ikki jamoa ko'rsatkichlari deyarli teng: «Bavariya» 52 ta, «PSJ» esa 53 ta gol o'tkazib yuborgan.
Myunxenliklar Parijga ketma-ket to'qqizta g'alaba bilan tashrif buyurmoqda.
“Zamin”ni Telegramʻda oʻqing!
