Atletiko Madrid prezidenti Enrike Sereso Chempionlar ligasi yarim finali doirasidagi Arsenalga qarshi javob uchrashuvi oldidan hazilomuz tarzda raqib jamoani Madridda o‘ziga xos «qasos» kutayotganini ma’lum qildi. Londonliklarning tushlikni soat 11:30 da belgilagani ispaniyalik funksionerni hayratda qoldirdi, chunki Madridda ovqatlanish odatlari ancha kechroq vaqtga to‘g‘ri keladi. Bu haqda Goal.com xabar beradi.
Sereso matbuotga bergan intervyusida: «Ular Madridga kelganlarida, biz tushlikni soat 15:00 ga belgilaymiz», — deya hazil qildi. Biroq, hazillardan tashqari, jamoa asosiy e’tiborini o‘yinga qaratgan. Birinchi o‘yinda qayd etilgan 1:1 hisobidan so‘ng, Diyego Simeone shogirdlari final yo‘llanmasi uchun bor kuchlarini ishga solishga tayyor.
Prezident jamoaning imkoniyatlariga yuqori baho berib, futbolchilarda bosim bo‘lishiga qaramay, xotirjamlik va ishonch saqlanib qolayotganini ta’kidladi. Uning so‘zlariga ko‘ra, Atletiko bunday muhim o‘yinlarga o‘rganib qolgan va tarixni takrorlashga qodir. Shuningdek, jarohatidan forig‘ bo‘lgan hujumchi Julian Alvarezning tarkibga qaytishi jamoa salohiyatini yanada oshirgan.
Agar Atletiko Madrid ushbu bosqichdan muvaffaqiyatli o‘tsa, finalda Bavariya yoki PSJ juftligi g‘olibi bilan to‘qnash keladi. Finalga chiqish klub uchun tarixiy voqea bo‘lishi kutilmoqda va jamoa a’zolari bu imkoniyatdan unumli foydalanishga ahd qilishgan.
“Zamin”ni Telegramʻda oʻqing!
