Bugun, 6 may kuni Yevropa futboli muxlislari diqqati yana Chempionlar ligasi yarimfinaliga qaratiladi. Myunxenning mashhur «Arena Myunxen» stadionida Germaniyaning FC Bayern Munich klubi Fransiyaning Paris Saint-Germain jamoasini qabul qiladi.
Mazkur bahs nafaqat ikki grand to‘qnashuvi, balki final yo‘llanmasi uchun hal qiluvchi jang sifatida ham katta qiziqish uyg‘otmoqda.
Yarimfinalning Parijda bo‘lib o‘tgan dastlabki uchrashuvi haqiqiy gollar shouiga aylangan edi. O‘sha dramatik to‘qnashuvda Paris Saint-Germain 5:4 hisobida g‘alaba qozonib, javob bahsi oldidan kichik ustunlikka ega bo‘lgan.
Endi esa FC Bayern Munich o‘z muxlislari qarshisida revansh olish va finalga chiqish uchun maydonga tushadi. Myunxenliklar uchun bu bahs mavsumning eng muhim uchrashuvlaridan biriga aylanishi mumkin.
Ikki jamoa o‘rtasidagi so‘nggi rasmiy bahslar ham keskin va murosasiz kechganini ko‘rish mumkin:
— 28 aprel 2026 yil. Chempionlar ligasi: «PSJ» — «Bavariya» 5:4
— 4 noyabr 2025 yil. Chempionlar ligasi: «PSJ» — «Bavariya» 1:2
— 26 noyabr 2024 yil. Chempionlar ligasi: «Bavariya» — «PSJ» 1:0
— 8 mart 2023 yil. Chempionlar ligasi: «Bavariya» — «PSJ» 2:0
— 14 fevral 2023 yil. Chempionlar ligasi: «PSJ» — «Bavariya» 0:1
Statistikaga e’tibor qaratilsa, so‘nggi yillarda FC Bayern Munich o‘zaro o‘yinlarda ma’lum ustunlikka ega bo‘lib kelgan. Biroq bu safar Parij klubi hujumda juda xavfli ko‘rinayotgani muxlislar orasida katta muhokamalarga sabab bo‘lmoqda.
Futbol ishqibozlari ayniqsa yulduzlarga boy tarkiblar o‘rtasidagi qarama-qarshilikni intiqlik bilan kutmoqda. Chunki har ikki klub ham nafaqat o‘z chempionatida, balki Yevropa sahnasida ham katta maqsadlar bilan harakat qilmoqda.
Uchrashuv Toshkent vaqti bilan soat 23:59 da start oladi. Muxlislarni esa yana bir shiddatli va dramatik futbol kechasi kutib turibdi.
“Zamin”ni Telegramʻda oʻqing!
