Liverpul klubi egasi John Henry bosh murabbiy Arne Slot va klub rahbariyatiga jiddiy ogohlantirish yo‘lladi. U Fenway Sports Group (FSG) kompaniyasi hech qachon o‘rtamiyona natijalar bilan kifoyalanmasligini ta’kidlab, jamoa oldiga yuksak talablar qo‘yilishini eslatib o‘tdi. Bu haqda Goal.com xabar beradi.
Joriy mavsumda Liverpul barcha musobaqalarda 18 ta mag‘lubiyatga uchradi. Bu 2014-15 yilgi mavsumdan buyon qayd etilgan eng yomon ko‘rsatkichdir. Garchi jamoa Chempionlar ligasi yo‘llanmasi uchun kurashayotgan bo‘lsa-da, klub xo‘jayini natijalarning pasayishidan norozi ekanini yashirmadi.
John Henry o‘zining boshqa sport loyihalaridagi tajribasiga tayanib, muxlislar noroziligi tabiiy hol ekanini, ammo rahbariyat vazifasi qiyinchiliklarga qaramay g‘alaba qozonish uchun yanada ko‘proq mehnat qilishdan iborat ekanini bildirdi. Uning so‘zlariga ko‘ra, klubda o‘rtamiyonalikka o‘rin yo‘q.
Shu bilan birga, Arne Slotning kelajagi borasida mish-mishlar tarqaldi. Niderlandiyaning Ayaks klubi mutaxassisni o‘z safiga qaytarishga uringan bo‘lsa-da, Slot Liverpul bilan 2027-yilgacha mo‘ljallangan shartnomasiga sodiq qolishini tasdiqladi.
Mavsum yakunlanishi bilan Slot tarkibni yangilash va jamoadagi barqarorsizlikni bartaraf etish vazifasini bajarishi kerak. Oldinda turgan Chelsi bilan bahs va Chempionlar ligasi yo‘llanmasi uchun kurash niderlandiyalik murabbiy uchun sinov vazifasini o‘taydi.
“Zamin”ni Telegramʻda oʻqing!
