Inter rahbariyati Cristian Chivu bilan yangi shartnoma imzolashga tayyorlanmoqda. Ruminiyalik mutaxassis o‘zining debyut mavsumidayoq jamoani 2025-26 yilgi mavsumda A Seriya chempionligiga olib chiqib, barchani hayratda qoldirdi. Bu haqda Goal.com xabar beradi.
Gazzetta dello Sport xabariga ko‘ra, klub 45 yoshli murabbiy bilan shartnomani 2028-yilning iyuniga qadar uzaytirishni rejalashtirmoqda. Ushbu kelishuv doirasida Chivuning yillik maoshi 2,1 million yevrodan 3 million yevroga oshirilishi ko‘zda tutilgan.
Simone Inzaghi ketganidan so‘ng jamoani qabul qilib olgan Chivu qisqa vaqt ichida Inter o‘yinini tubdan o‘zgartirdi. Klub prezidenti Beppe Marotta murabbiyning mehnatini yuqori baholab, uni uzoq yillar davomida Milanda qolishini istayotganini bir necha bor ta’kidlagan.
Chivuning murabbiylik faoliyati juda tez rivojlandi. U 2018-2024 yillar davomida Inter yoshlar akademiyasida ishlagan, 2025-yil boshida esa Parma jamoasida qisqa muddat faoliyat yuritgan edi. Uning yosh iqtidorlarni tarbiyalashdan katta yulduzlarni boshqarishga o‘tishi juda muvaffaqiyatli kechdi.
“Zamin”ni Telegramʻda oʻqing!
