Manchester Siti klubi Real Madrid hujumchisi Vinicius Juniorning kelajagi noaniq qolayotganidan foydalanib, braziliyalik futbolchini o‘z safiga qo‘shib olish imkoniyatlarini ko‘rib chiqmoqda. Futbolchining Madrid klubi bilan amaldagi shartnomasi yakuniga yetib borayotgani va tomonlar yangi bitim bo‘yicha kelisha olmayotgani transfer mish-mishlarini kuchaytirmoqda. Bu haqda Goal.com xabar beradi.
Ma’lumotlarga ko‘ra, Vinicius Junior maosh borasida Kylian Mbappe bilan teng shartlar talab qilmoqda, biroq Real Madrid rahbariyati bu talabni qondirishga shoshilmayapti. Florentino Perez uchun yozgi transfer oynasi futbolchini tekinga qo‘yib yubormaslik uchun so‘nggi imkoniyat bo‘lishi mumkin.
Manchester Siti hujum chizig‘ini kuchaytirish maqsadida braziliyalik yulduzni asosiy nishon sifatida belgilagan. Garchi Jeremy Doku kabi futbolchilar tarkibda bo‘lsa-da, klub rahbariyati Vinicius darajasidagi o‘yinchini qo‘lga kiritishni noyob imkoniyat deb hisoblamoqda.
Real Madrid ichidagi ichki ziddiyatlar va murabbiylar shtabidagi o‘zgarishlar ham futbolchining jamoani tark etish ehtimolini oshirmoqda. Ayni damda Manchester Siti poygada yetakchilik qilayotgan bo‘lsa-da, Arsenal va Chelsi klublari ham vaziyatni diqqat bilan kuzatib bormoqda.
“Zamin”ni Telegramʻda oʻqing!
