Hansi Flick Barselona jamoasini ketma-ket ikkinchi marta Ispaniya chempioni qildi. Real Madrid ustidan qozonilgan 2:0 hisobidagi gʻalaba kataloniyaliklarga muddatidan avval chempionlikni taqdim etdi. Uchrashuvdan bir necha soat oldin otasidan ayrilgan nemis mutaxassisi uchun bu gʻalaba ham quvonchli, ham ogʻir kechdi. Bu haqda Goal.com xabar beradi.
Oʻyindan soʻng jurnalistlarga intervyu bergan Flick oʻz shogirdlarining matonatini alohida taʼkidladi. U jamoa prezidenti, Deco va barcha qoʻllab-quvvatlovchilarga minnatdorchilik bildirib, futbolchilarning 90 daqiqa davomida koʻrsatgan kurashuvchanligidan faxrlanishini aytdi.
Ichki chempionatdagi muvaffaqiyatdan soʻng, Flick oʻz oldiga yangi maqsad qoʻydi. U kelasi mavsumda Barselona bilan Chempionlar ligasi bosh sovrinini qoʻlga kiritishni niyat qilganini ochiqladi. Murabbiy jamoaning himoyadagi ishonchli oʻyini va yosh iqtidorlar, xususan, Pau Cubarsi hamda Gerard Martinning oʻsishidan mamnunligini yashirmadi.
Mavsum davomida jarohatlar bilan bogʻliq qiyinchiliklarga qaramay, Barselona barqaror oʻyin namoyish etdi. Flick jamoa ichidagi muhit aʼlo darajada ekanligini va Barselonada oʻzini baxtli his qilayotganini qoʻshimcha qildi.
“Zamin”ni Telegramʻda oʻqing!
