Barselona bosh murabbiyi Xansi Flik klub bilan shartnomasini 2028-yilgacha uzaytirishini tasdiqladi. Germaniyalik mutaxassis jamoani Ispaniya chempionligiga olib chiqqanidan so‘ng, o‘zini aynan kerakli joyda ekanligini his qilayotganini ta’kidladi. Bu haqda Goal.com xabar beradi.
Kataloniya klubi Real Madrid ustidan qozonilgan 2:0 hisobidagi g‘alabadan so‘ng muddatidan avval chempionlikni rasmiylashtirdi. Ushbu muvaffaqiyat Flikning klubdagi barqarorlikni tiklash va ichki chempionatda g‘olib chiqish yo‘lidagi samarali mehnatining natijasidir.
Flik klub rahbariyatiga ko‘rsatgan ishonchi uchun minnatdorchilik bildirib, endilikda asosiy maqsad Chempionlar ligasida zafar quchish ekanligini aytdi. U shartnomada tomonlarning kelishuvi bilan uni muddatidan avval yakunlash imkoniyati ham mavjudligini qo‘shimcha qildi.
Chempionlik masalasi hal bo‘lganiga qaramay, murabbiy mavsum yakunigacha bo‘lgan o‘yinlarda bo‘shashmaslikni talab qilmoqda. Flikning maqsadi — joriy mavsumda 100 ochko jamg‘arish va qolgan barcha uchrashuvlarda g‘alaba qozonib, yangi rekordlar o‘rnatish.
“Zamin”ni Telegramʻda oʻqing!
