Liverpulning sobiq bosh murabbiyi Yurgen Klopp o‘zining keskin va samimiy fikrlari bilan yana diqqat markaziga tushdi. GOAL nashriga bergan eksklyuziv intervyusida nemis mutaxassisi futbol va Amerika sporti yulduzlarini taqqoslab, kutilmagan bayonotlar berdi. Bu haqda Goal.com xabar beradi.
Kloppdan Nyu-York Niks va Manchester Yunayted o‘rtasida tanlov qilish so‘ralganda, u ikkilanmasdan NBA vakilini tanladi. Bu qaror Liverpul muxlislarini xursand qilgan bo‘lsa-da, Old Trafford ishqibozlari uchun haqoratli tuyulishi mumkin. Klopp o‘zining Angliya Premer-ligasidagi azaliy raqibiga nisbatan tanqidiy munosabatini yashirib o‘tirmadi.
Shuningdek, Klopp o‘zining Chempionlar ligasida g‘olib chiqqan Liverpul jamoasini 1990-yillardagi afsonaviy Chikago Bullz jamoasi bilan solishtirdi. Maykl Jordan boshchiligidagi basketbol qirollariga qarshi o‘z jamoasini ustun qo‘ygan murabbiy, Liverpulda shakllantirgan "mentality monsters" g‘oliblik ruhiga bo‘lgan yuksak ishonchini namoyish etdi.
Suhbat yakunida "barcha davrlarning eng yaxshisi" (GOAT) bahsiga to‘xtalgan Klopp Lionel Messi va Maykl Jordan o‘rtasida tanlov qila olmadi. U vaziyatdan chiqib ketish uchun hazilomuz tarzda "Maykl Messi va Lionel Jordan" deya javob berib, har ikki sport afsonasiga ham hurmat ko‘rsatdi.
“Zamin”ni Telegramʻda oʻqing!
