Arne Slot o‘zining so‘nggi bayonotlariga ko‘ra, yozgi mavsumdan keyin ham Liverpul bosh murabbiyi lavozimida qolishi kutilmoqda. Jamoaning mavsumdagi nobarqaror o‘yinlari va Angliya Premer-ligasi yakunlanishiga ikki tur qolganida kuchli to‘rtlikdagi o‘rnini hali kafolatlamaganiga qaramay, niderlandiyalik mutaxassis Enfildda qolishiga ishora qilmoqda. Bu haqda Goal.com xabar beradi.
Matbuot anjumanida 47 yoshli murabbiy o‘z pozitsiyasida qat’iy ekanligini ta’kidladi. U Aston Villa bilan bo‘ladigan muhim bahs oldidan: "Kelasi mavsumda ham Liverpul murabbiyi bo‘lib qolishimga ishonishim uchun barcha asoslarim bor", – deya bayonot berdi. Shuningdek, u transfer bozorida faol bo‘lish rejalarini tasdiqlab, klub rahbariyati bilan yangi futbolchilar bo‘yicha muzokaralar olib borilayotganini qo‘shimcha qildi.
Mavsum davomida Xabi Alonso bilan bog‘liq mish-mishlar va muxlislarning noroziligi Slotning iste’fosi haqidagi gap-so‘zlarni kuchaytirgan edi. Ayniqsa, Rio Ngumoha o‘rniga Alexander Isakning maydonga tushirilishi muxlislar tomonidan salbiy kutib olindi. Shunga qaramay, murabbiy jamoani Chempionlar ligasi yo‘llanmasi sari yetaklamoqda.
Liverpul joriy mavsumda standart vaziyatlardan gol o‘tkazib yuborish bo‘yicha antirekord o‘rnatdi. Enzo Fernandezning jarima zarbasidan kiritgan goli jamoaning joriy mavsumda standartlardan o‘tkazib yuborgan 18-goli bo‘ldi, bu esa Angliya Premer-ligasi tarixidagi klub uchun eng yomon ko‘rsatkich hisoblanadi.
“Zamin”ni Telegramʻda oʻqing!
