Bavariya darvozaboni Jonas Urbigning muvaffaqiyatli oʻyinlari Myunxen klubi uchun qoʻshimcha moliyaviy xarajatlarni keltirib chiqarmoqda. Kölner Stadt-Anzeiger xabariga koʻra, 1. FC Köln klubi bilan tuzilgan transfer shartnomasida darvozabonning oʻyin amaliyotiga bogʻliq bonuslar koʻzda tutilgan. Bu haqda Goal.com xabar beradi.
Urbigning Volfsburgga qarshi bahsda (1:0) maydonga tushishi uning Bavariya safidagi 30-uchrashuvi boʻldi. Bu natija Kyoln klubiga qoʻshimcha 2 million yevro daromad keltirdi. 2025-yil yanvarida 7 million yevroga sotib olingan 22 yoshli posbonning umumiy transfer qiymati barcha shartlar bajarilsa, 15 million yevrogacha yetishi mumkin.
Bundan tashqari, agar Jonas Urbig Germaniya terma jamoasi safida debyut qilsa, Bavariya yana 1 million yevro toʻlashi kerak boʻladi. Lothar Matthäus va Mario Basler kabi mutaxassislar yosh darvozabonning terma jamoaga chaqirilishi va hatto Jahon chempionatida asosiy tarkibda tushishi kerakligini taʼkidlamoqda.
Ayni damda Manuel Neuerning faoliyatini yakunlash yoki terma jamoaga qaytish borasidagi noaniqliklar davom etmoqda. Bavariya rahbariyati Neuer bilan shartnomani uzaytirishni rejalashtirmoqda, biroq tajribali darvozabon kelajakda Urbig bilan rotatsiya asosida harakat qilishi va unga ustozlik qilishi kutilmoqda.
“Zamin”ni Telegramʻda oʻqing!
