Jamal Musiala Bavariya afsonasi Thomas Müllerning jamoani tark etganidan qattiq qayg‘uda. O‘tgan yozda Vancouver Whitecaps safiga o‘tib ketgan tajribali futbolchi jamoada katta bo‘shliq qoldirdi. Musiala Sky nashriga bergan intervyusida uning maydondagi borligi va ijobiy energiyasi juda yetishmayotganini ta’kidladi. Bu haqda Goal.com xabar beradi.
2020-yildan 2025-yilgacha birga to‘p surgan bu ikki futbolchi o‘rtasida juda yaqin do‘stlik aloqalari shakllangan edi. Musiala o‘zining faoliyatini endi boshlagan paytlarida Müller unga ko‘plab maslahatlari bilan yordam berganini minnatdorchilik bilan esladi.
O‘tgan yozda Pari Sen-Jermen jamoasiga qarshi kechgan Klublar o‘rtasidagi jahon chempionati chorak finalida Musiala jiddiy jarohat olib, uzoq muddatga safdan chiqqandi. Aynan o‘sha uchrashuv Müllerning Bavariya safidagi so‘nggi o‘yini bo‘lib qoldi. Hozirgi qiyin pallada yosh yarim himoyachi aynan Müller bilan dildan suhbatlashishni istashini yashirmadi.
Musiala o‘zining jarohatdan keyingi tiklanish jarayoni haqida gapirar ekan, barchasi bosqichma-bosqich ketayotganini qayd etdi. U oldinda turgan Jahon chempionatiga tayyorgarlik ko‘rishda shoshilmaslik va kichik qadamlar bilan harakat qilish muhimligini ta’kidladi.
Shuningdek, u jamoadoshi Michael Olisening o‘yiniga yuqori baho berdi. Musialaning fikricha, Olise o‘z o‘yinini har tomonlama kuchaytirgan va joriy mavsumning eng yaxshi futbolchilaridan biriga aylangan.
“Zamin”ni Telegramʻda oʻqing!
