Ispaniyaning Real Madrid klubi jiddiy jarohat olib safdan chiqqan sardori Dani Carvajal oʻrniga munosib nomzodlarni koʻrib chiqmoqda. Turli OAV xabarlariga koʻra, klub oʻng qanot himoyasini kuchaytirish uchun uchta asosiy variantni shakllantirgan. Qiziqarlisi, asosiy nomzodlar Angliya Premer-ligasi bilan bogʻliq boʻlib, ulardan biri Jose Mourinho davrida Manchester Yunayted safiga kelib qoʻshilgan edi. Bu haqda Goal.com xabar beradi.
Sport nashrining yozishicha, Manchester Yunayted himoyachisi Diogo Dalot Madrid klubi qiziqishlari doirasida turibdi. Jose Mourinho 2018-yilda vatandoshini 22 million yevro evaziga FC Porto klubidan Angliyaga olib kelgan edi. Hozirda 27 yoshli Dalot ham oʻng, ham chap qanotda birdek harakat qila oladi. Uning mankunianliklar bilan shartnomasi 2028-yilgacha amal qiladi va klub uni osonlikcha qoʻyib yubormoqchi emas.
Ikkinchi variant sifatida Tottenxem aʼzosi Pedro Porro tilga olinmoqda. Biroq, As nashri xabariga koʻra, 26 yoshli futbolchining transfer narxi Real Madrid uchun juda qimmatlik qilishi mumkin. Tottenxem 2023-yilda Sporting CP klubiga Porro uchun 40 million yevro toʻlagan edi. Hozirda London klubi oʻz yetakchisini arzon narxga sotish niyatida emas.
Uchinchi va eng arzon variant — klub akademiyasi tarbiyalanuvchilariga ishonch bildirish. Real Madrid yoshlar jamoasidagi Jesus Fortea va David Jimenez kabi iqtidorlar Trent Alexander-Arnold transferi amalga oshgunga qadar zaxira varianti sifatida koʻrilmoqda. Fortea kelajak yulduzi sifatida eʼtirof etilayotgan boʻlsa, Jimenez allaqachon asosiy jamoa mashgʻulotlariga jalb etilgan.
“Zamin”ni Telegramʻda oʻqing!
