Arsenal yarim himoyachisi Mikel Merino oʻz faoliyatini xavf ostida qoldirgan noyob jarohat va besh oylik tanaffusning psixologik qiyinchiliklari haqida ochiq gapirdi. Ispaniyalik futbolchi oyogʻidagi kam uchraydigan sinish tufayli jarrohlik amaliyotini oʻtab, jamoaviy mashgʻulotlarga qaytganidan soʻng, jamoadoshlarining qoʻllab-quvvatlashi uchun minnatdorchilik bildirdi. Bu haqda Goal.com xabar beradi.
29 yoshli mahoratli futbolchi yanvar oyida Manchester Yunaytedga qarshi kechgan bahsdan soʻng safdan chiqqan edi. Oʻsha oʻyinda u zaxiradan maydonga tushib gol urgan, biroq kutilmaganda oyogʻidan ogʻir jarohat olgan edi. Murakkab sinish darhol jarrohlik amaliyotini va uzoq davom etadigan reabilitatsiya jarayonini talab qildi, bu esa uning 21 oʻyinda 4 ta gol va 3 ta assist qayd etgan muvaffaqiyatli mavsumini toʻxtatib qoʻydi.
Merino mutaxassislar ham ilgari duch kelmagan ushbu jarohatdan qattiq qoʻrqqanini tan oldi. "Bu oyogʻimning juda gʻalati qismidagi sinish edi, hatto mutaxassislar ham buni avval koʻrishmagan. Boshida juda qoʻrqib ketdim, chunki boshqa futbolchilarda bunday holat kuzatilmagan edi. Qanday tiklanishni va yana futbol oʻynay olishimni bilmasdik", — dedi futbolchi klub rasmiy kanaliga bergan intervyusida.
Jarohat sababli Jahon chempionatini va mavsumning hal qiluvchi qismini oʻtkazib yuborishini bilgan Merino tushkunlikka tushganini yashirmadi. "Menda ikkita yoʻl bor edi: tushkunlikka tushib yigʻlash yoki boshimni tik tutib, ijobiy kayfiyatda ishlashda davom etish. Men ikkinchi yoʻlni tanladim va hayotga shunday yondashishga qaror qildim", — deya qoʻshimcha qildi u.
Mashgʻulotlarga qaytgan kuni oʻzini xuddi maktabga birinchi marta borayotgan boladek his qilganini aytgan Merino, Arsenal jamoasidagi muhitdan mamnunligini bildirdi. Uning soʻzlariga koʻra, jamoadoshlarining mehri va klub rahbariyatining ishonchi uning tezroq safga qaytishiga katta yordam bergan.
“Zamin”ni Telegramʻda oʻqing!
