Liverpul himoyachisi Andy Robertson kelasi mavsum oldidan shartnomasi yakunlangach, Tottenxem safiga qoʻshilish boʻyicha ogʻzaki kelishuvga erishdi. Shotlandiya terma jamoasi sardori Enfildni toʻqqiz yillik muvaffaqiyatli faoliyatdan soʻng tark etmoqda. Roberto De Zerbi boshqaruvidagi Tottenxem Angliya Premer-ligasida jon saqlab qolganidan soʻng, tajribali himoyachi faoliyatini aynan London klubida davom ettirishga qaror qildi. Bu haqda Goal.com xabar beradi.
Transfer eksperti Fabrizio Romano bergan maʼlumotlarga koʻra, Tottenxem Robertson uchun kurashda gʻolib chiqqan. Yanvar oyida amalga oshmay qolgan transfer nihoyat yakuniga yetmoqda. Yakshanba kuni Brentford bilan oʻyindagi xayrlashuvdan soʻng, 32 yoshli futbolchi shimoliy Londonga yoʻl oladigan boʻldi. Bu transfer Tottenxem uchun katta gʻalaba hisoblanadi, chunki ular Italiyaning Yuventus klubi bilan boʻlgan raqobatda ustun kelishdi.
Tottenxem mavsum yakunida Roberto De Zerbi qoʻl ostida haqiqiy moʻjiza koʻrsatib, ligada qolishga muvaffaq boʻldi. Italiyalik mutaxassis inqirozga botgan jamoani qabul qilib olib, soʻnggi yetti oʻyinda muhim ochkolarni qoʻlga kiritdi. Natijada Spurs oʻzining azaliy raqibi Vest Xem quyi ligaga tushib ketgan bir paytda, elitada qolishni uddaladi.
Liverpul uchun Robertsonning ketishi katta yoʻqotish boʻldi. Jamoani allaqachon Muhammad Salah tark etgan boʻlsa, darvozabon Alisson Becker ham Yuventus qiziqishlari doirasida boʻlib turibdi. Shuningdek, Ibrahima Konate ham oʻz kelajagi borasida bir qarorga kelishi kutilmoqda. Yangi murabbiy Arne Slot oʻtgan mavsumdagi chempionlikdan soʻng beshinchi oʻringa tushib ketgan jamoani qayta qurish kabi qiyin vazifa qarshisida turibdi.
“Zamin”ni Telegramʻda oʻqing!
