«Barselona»da Neymarning ketish haqidagi ogohlantirishiga ishonishmagan

«Barselona» rahbariyati iyul oyining boshida hujumchi Neymarning «PSJ»ga o‘tib ketishi mumkinligidan ogohlantirish olishgan, biroq bunga qarshi biror harakatni amalga oshirishmagan. Bu haqda «Sport.es»ga tayanib «Kun.uz» yozmoqda.

Manbaning kuzatuvlarga asoslanib ma’lumot berishicha, Neymar va uning otasi bilan doimiy muloqotda bo‘luvchi, shuningdek ko‘k-anorranglilar rahbariyati bilan ham aloqalari bo‘lgan odamlar «Barsa» funksionerlarini Neymarning «PSJ» bilan muzokara olib borayotgani va futbolchining ketish xavfi borligini bildirishgan. Shunga qaramay, kataloniyaliklar rahbariyati ularning so‘ziga e’tibor bermagan va parijliklarning Neymar uchun tovon puli bo‘lgan 222 mln. evroni to‘lay olishiga ishonishmagan.

«Barselona» prezidenti va Neymar o‘rtasidagi suhbat u ta’tildan qaytib kelgach, matbuotda barcha gaplar urchib bo‘lgach bo‘lib o‘tgan. Bungacha bo‘lgan davrda esa futbolchining otasi parijliklar bilan faol tarzda muzokara olib borgan va shartnomaning dastlabki shartlari bo‘yicha kelishuvga erishgan.

Ko‘k-anorranglilar rahbari bilan suhbatda Neymar klubda qolish niyatida emasligini aytgan. Shundan so‘ng klub vakillari, futbolchilar va murabbiylar uni klubda qolishi uchun ko‘ndirish harakatiga tushib qolishgan. Dastlab bu ish ularda o‘xshayotgandek taassurot uyg‘otgandi, ammo so‘nggi vaqtga kelib Neymarning «PSJ»ga o‘tishi yanada aniqroq variant bo‘lib qolmoqda

Eslatib o‘tamiz, oldinroq tarqatilgan xabarlarga ko‘ra, Neymar parijliklar bilan shartnoma imzolasa, unga bonus sifatida 50 million evro mukofot puli beriladi. Brazilning yillik maoshi esa 30 mln. evroni tashkil qiladi. Bu barcha soliqlarni chiqarib tashlanganda to‘lanadigan sof maosh sanaladi. “Zamin” yangiliklarini “Twitter”da kuzatib boring