12:31 / 03.12.2019

Lionel Messi: “Ketish vaqti yaqinlashmoqda, buni anglash ogʻir”

“Barselona” va Argentina milliy jamoasi hujumchisi Lionel Messi oltinchi bor “Oltin toʻp”ni qoʻlga kiritgandan soʻng oʻz fikrlari bilan oʻrtoqlashdi.

“Men birinchi bor «Oltin toʻp”ni olishga aka-ukalarim bilan 22 yoshimda Parijga kelganimni eslayman. Oʻn yil avval ham hozirgiday his edi. Men bu yerda rafiqam, uch oʻgʻlim, akam va jiyanim bilanman.

Shu vaqtgacha orzu qilishni, oʻsishni, kundan kunga yaxshilanishni va futboldan zavqlanishni toʻxtatmadim.

Necha yoshda ekanligimni bilaman, ketish vaqti yaqinlashmoqda va bu juda qiyin. Hali oldimda bir necha yil turgan boʻlsa ham, vaqt oʻtib ketayotgandek tuyuladi. Hammasi juda tez sodir boʻladi. Futboldan, oilamdan, raqiblarimdan va hayotimdan zavq olishda davom etaman», – deb 32 yoshli argentinalikning soʻzlarini keltiradi Marca.

“Oltin toʻp”ning 6 karra sohibi yana bir bor Chempionlar ligasida gʻolib boʻlish hamda Amerika Kubogida zafar quchish istagini bildirgan.

“Men hamisha shaxsiy sovrinlar oʻrniga Chempionlar ligasida yoki Amerika Kubogida gʻolib boʻlishni afzal koʻrishim haqida gapirib kelganman. Men hozir 32 yoshdaman. Barchasi oʻzimni qanday his qilishimga bogʻliq. Bugun men har doimgidan koʻra tetikman”, degan futbolchi.

Lionel Messi bunga qadar 2009, 2010, 2011, 2012 va 2015-yillarda ham Yevropada yilning eng yaxshi futbolchisi sifatida taqdirlangandi. Endi u bu borada beshta sovringa ega boʻlgan “Yuventus” hujumchisi Krishtianu Ronalduni ortda qoldirmoqda.

“Oltin toʻp” uchun ovoz berish natijalariga koʻra argentinalik futbolchi 686 ball toʻplagan, u asosiy raqibi, “Liverpul” himoyachisi Virjiyl van Deykdan atigi 7 ballik farq bilan ustun kelgan. Uchinchi oʻrinni 476 ball bilan Krishtianu Ronaldu band etgan. Kuchli beshlikdan “Liverpul”ning yana ikki futbolchisi oʻrin olgan - Sadio Mane (347 ball) va Muhammad Saloh (178 ball).