Qozog‘istonlik ikki karra Olimpiada sovrindori O‘zbekistonda tavallud topganini bilasizmi?

O‘zbekistonda tavallud topgan va keyinchalik Qozog‘istonga ko‘chib ketib, u yerda yuksak natijalar qayd etgan bokschilar haqida ma’lumot berish an’anasini davom ettiramiz. Bu safar 81 kg vazn toifasida jahonning o‘z vaqtidagi yetakchilaridan biri, hamyurtimiz Elshod Rasulov bilan bir necha bora ajoyib janglar o‘tkazgan, asli mamlakatimizda tavallud topgan, bolalik xotiralari yurtimiz bilan bog‘liq Adilbek Sabitovich Niyazimbetov haqida to‘xtalmoqchimiz.

Ushbu charmqo‘lqop ustasi 1989 yil 19 mayda Qoraqalpog‘iston Respublikasi, Nukus shahrida tavallud topgan. Yoshligida oila a’zolari bilan Qozog‘istonning Aqtau shahriga ko‘chib ketadi. Qozoq zaminida bokschi bo‘lib kamol topadi. Niyazimbetov 2000 yildan boks bilan shug‘ullana boshlagan. Faoliyati mobaynida salmoqli g‘alabalar qayd etadi.

Jumladan, 2007 yil yoshlar o‘rtasida Osiyo chempionati g‘olibi (64 kg), 2008 yil Taraz shahrida bo‘lib o‘tgan Qozog‘iston chempionati g‘olibi (69 kg), 2011 yil Ozarbayjonning Boku shahri mezbonligidagi jahon chempionati kumush medal sohibi (81 kg), 2012 yilgi London Olimpiadasining vitse-chempioni (81 kg), 2013 yil Iordaniyaning Amman shahrida tashkil qilingan Osiyo chempionatida 2-o‘rin 981 kg), 2013 yil Almati shahrida bo‘lib o‘tgan jahon chempionati kumush medal sohibi (81 kg), 2014 yil Janubiy Koreyaning Inchxon shahridagi Osiyo o‘yinlari g‘olibi (81 kg), 2015 yil Tailandning Bankok shahridagi Osiyo chempionati g‘olibi (81 kg), 2016 yilgi Rio-de-Janeyro Olimpiadasi kumush medal sohibi (81 kg)ga aylana olgandi.

U mazkur zalvorli natijalari uchun “Qozog‘istonda xizmat ko‘rsatgan sportchi”, “Hurmat” ordeni, II-darajali “Baris” ordeni kavaleri, “Darin” yoshlar davlat mukofoti bilan taqdirlangan. Ayni kunda Adilbek Aqtau shahrida istiqomat qilmoqda.
“Zamin” yangiliklarini “Instagram”da kuzatib boring