Shomurodov bir ko‘rsatkich bo‘yicha “Roma”da yetakchi yoxud Mourino qanday xatoga yo‘l qo‘ydi?

Italiya futboli statistikasi bilan shug‘ullanayotgan tahlilchilari “Roma” futbolchilarining assistlari bo‘yicha reytingini e’lon qildi.

A Seriyaning so‘nggi turida Eldor Shomurodov “Venetsiya”ga qarshi o‘tkazilgan uchrashuvda o‘zi darvozani ishg‘ol qilganidan tashqari Temmi Abraxamga golli pas ham oshirdi. Italiya chempionatida “Roma”dagi gollari hisobini ochgan legionerimiz golli pas oshirish bo‘yicha eng yaxshi ko‘rsatkichni qayd etmoqda.

“Venetsiya” bilan to‘qnashuvdan so‘ng Shomurodov assistlari sonini uchtaga yetkazib, ikkitadan golli pas muallifi bo‘lgan Genrix Mxitaryan, Temmi Abraxam, Lorenso Pellegrini va Jordan Veretudan o‘zib ketdi.

Bundan tashqari, Shomurodov UYEFA Konferensiyalar ligasida ham bitta to‘p kiritgan va jamoadoshlariga bir juft golli pas oshirgan. Hamyurtimiz 2+5 natijasini qayd etish uchun jami 580 daqiqa sarflagan.

Mourino nishonida to‘rt futbolchi
“Roma” o‘ng qanot himoyachisi Rik Karsdorpga raqobatchi qidirmoqda. Ayni paytda klub sport direktori Tyago Pinto yanvarda taklif etiladigan nomzodlar bilan muzokaralar o‘tkazmoqda. Joze Mourino “Manchester Yunayted”dagi sobiq shogirdi Diogu Dalot, “Sampdoriya”da o‘ynayotgan Polsha terma jamoasi a’zosi Bartosh Bereshinski, “Lill” vakili Mexmet Chelik va “Feyenorord” o‘yinchisi Markus Pedersen kabi futbolchilarni o‘z jamoasida ko‘rmoqchi.

“Roma” Dalotga qancha sarflashi ma’lum bo‘ldi
“Roma” qishki transferlar vaqtida Diogu Dalotni keyinchalik sotib olish huquqi bilan ijaraga olish variantini ko‘rmoqda.

“Roma” 22 yoshli himoyachi uchun tayyorlayotgan taklifda uni mavsum oxirigacha ijaraga olib, bu muddat uchun 1,5 million yevro miqdorida pul to‘lamoqchi. Agar Dalot portugaliyalik mutaxassisning ishonchini qozona olsa, rimliklar uni yozda 15 million yevroga to‘liq transfer qiladi.

“Manchester Yunayted” bosh murabbiyi Ule-Gunnar Sulsher Dalotga yetarli o‘yin amaliyoti bermayapti. Iste’dodli himoyachi joriy mavsumda oltita uchrashuvda maydonga tushib, jami 316 daqiqa o‘ynadi.

Uning manchesterliklar bilan shartnomasi 2023 yilning yarmigacha davom etadi.

Mourino bu transferga ko‘nmadi
Angliyalik futbolchi Kalum Chembersning agentlari 26 yoshli himoyachining xizmatlarini “Roma”ga taklif qildi.

Yaqinda Chembersning “Arsenal” bilan amaldagi shartnomasi yakunlandi va londonliklar u bilan hamkorlikni davom ettirishni istamadi. Garchi ayni paytda Kalum erkin agent sifatida “Roma”ga tekinga qo‘shilishi mumkin bo‘lsa-da, Joze Mourinoga bu o‘yinchi ma’qul kelmadi.

Kalum Chembers 2013-2014 yillari “Sautgempton”da o‘ynaganidan keyin “Arsenal”ga transfer qilingan. Bu himoyachi orada “Midlsbro” va “Fulxem”ga ijaraga ham berilgan.

2014 yili Angliya terma jamoasi safida uchta uchrashuvda qatnashgan edi.

Mourino xato qildimi?
Mutaxassislar Joze Mourino “Roma”ni qabul qilib olganidan keyin ispaniyalik jahon chempioni Pedroga e’tibor qaratmaganini tanqid ostiga olmoqda.

Ma’lumki, portugaliyalik mutaxassis “Roma”ni qabul qilib olganidan keyin futbolchilar orasidan o‘ziga ma’qullarini tanladi va qolganlarini mashg‘ulotlarga qo‘ymadi va klub mutasaddilariga ularga boshqa ish topib berishni uqtirdi.

Pedro murabbiy mashg‘ulotlarga qo‘shmagan guruhda qoldi. Agar u o‘ziga Italiyaning o‘zidan jamoa topmaganida “Roma” moliyaviy tomondan zarar ko‘rardi.

Yaxshiki, “Latsio” bosh murabbiyi Maurisio Sarri ispan hujumchisining muxlisi chiqib qoldi va Mourino kerak bo‘lmay qolgan o‘yinchini Rimning ikkinchi klubida olib qoldi. Pedro ham ishonchni oqlayapti. U joriy mavsumda birinchi golini aynan “Roma” darvozasiga urdi. Shundan so‘ng uning ishtahasi ochilib, yana uch marta to‘p kiritdi.

Ma’lumot o‘rnida, Mourino tanlagan “Roma” hujumchilarining birortasi gollari sonini hali to‘rttaga yetkazgani yo‘q. “Zamin” yangiliklarini “Vkontakti”da kuzatib boring