“Roma” A Seriyaning navbatdagi turida “Olimpiko”da “Spetsiya”ni qabul qiladi. Bu uchrashuv Joze Mourino shogirdlari uchun muhim. Rimliklar “Bolonya” va “Inter” bilan bo‘lgan avvalgi tur o‘yinlarida ketma-ket ikki mag‘lubiyatdan keyin muxlislar ko‘z o‘ngida o‘zini oqlab qolishi, musobaqa jadvalida ko‘tarilish yo‘lini topishi kerak bo‘ladi.
Ayni paytda “Roma” sakkizinchi pog‘onaga tushib qolgan va Yevrokuboklar hududidan bir qator pastda joylashgan. Bu galgi uchrashuvda portugaliyalik mutaxassis turli darajadagi jarohatlarini davolatayotgan Leonardo Spinatssola, Gonsalo Vilyar, Lorenso Pellegrini, Stefan El-Shaaravi, Karlos Peres, diskvalifikatsiyaga uchragan Janluka Manchini va Nikolo Dzanolo kabi yetakchi o‘yinchilar xizmatidan foydalana olmaydi.
- “Roma” hujumida Temmi Abraxam va Eldor Shomurodov tandemi boshlang‘ich tarkibdan joy oladi. Shuningdek, Borxa Mayoral borligini ham unutmang, - deb yozmoqda "Spetsiya"ga qarshi o‘yin oldidan www.calciomercato.com jurnalistlari.
Ta’kidlash joizki, Mourino Rim klubini qabul qilib olganidan keyin o‘tgan mavsum to‘purari Borxa Mayoralni zaxiraga mixlab qo‘ygandi. Joze ko‘proq yangi hujumchilardan Temmi Abraxam va Eldor Shomurodov, shuningdek, Xitoydan qaytib kelgan Stefan El-Shaaraviga ishonch bildirib kelayotgan edi.
Lekin Konferensiyalar ligasi guruh bosqichining so‘nggi turida ispan hujumchisi Bolgariyada SSKA darvozasiga gol urib, jamoasining 3:2 hisobidagi muhim g‘alabasiga hissa qo‘shdi va rimliklarni guruhda birinchi o‘rinni egallashini ta’minladi.
“Roma” hujumchilari orasida Temmi Abraxam raqobatdan tashqarida. U bilan birga o‘ynash yoki o‘rninibosish huquqi uchun raqobat o‘zbek hujumchisi va “Real” tarbiyalanuvchisi o‘rtasida kechmoqda. Shomurodov tarkibdagi o‘rnini Mayoralga boy bermaslik uchun shoshilmasa bo‘lmaydi. Eldor o‘z hisobiga gol va assistlar rasmiylashtirishi shart. Hozircha hamyurtimiz Rim klubida ikkita turnirda atigi ikkita gol va beshta assist qayd etdi xolos.
Mourino joriy mavsumda yaqinda bir hujumchi taktikasidan voz kechib, “Venetsiya”ga qarshi uchrashuvda ikki forvard – Abraxam va Shomurodov tandemini ilk daqiqalardan o‘ynatib, o‘ziga xos sinov uyushtirdi. Garchi to‘qnashuv boy berilgan bo‘lsa-da, Temmi va Eldor bittadan to‘p kiritib, bir birining gol urishiga imkon yaratib berdi. Ya’ni, bu taktika o‘zini oqladi.
Hozir, “Roma” safida jangga yaroqli uch hujumchi – Abraxam, Shomurodov va Mayoral qolgan. Mourinoning kashfiyoti Feliks Afena-Gyan koronavirusdan tuzaldi, lekin darrov maydonda javlon urishiga unchalik ishonch yo‘q.
Italiya futbolini yoritishga ixtisoslashgan www.calciomercato.com sayti taxminiy tarkibni quyidagicha tuzdi.
“Roma” (3-5-2): Ruy Patrisio; Kumbulla, Smolling, Ibanez; Karsdorp, Kristante, Veretu, Mxitaryan, Vina; Shomurodov, Abraxam.
“Spetsiya” (4-3-3): Provedel; Amian, Erlik, Xristov, Reka; Mayor, Sala, Kovalenko; Grin, Manadj, Gyasi.
Bu ikki klub o‘rtasidagi o‘zaro uchrashuvlar gollarga boy bo‘lgan. Ular A Seriya doirasida o‘tgan yili ilk bor to‘qnash keldi va rimliklar “Olimpiko”da 4:3 hisobida zafar quchdi, Spetsiyadagi bahsda 2:2 hisobida durang qayd etildi. Mazkur ikki uchrashuvda Mayoral ikkita, Pellegrini, Karsdorp, Mxitaryan, El-Shaaravi bittadan to‘p kiritgan.
Eldor Shomurodovdan ham “Spetsiya”ga gol urish tajribasi bor. Hamyurtimiz o‘tgan mavsumda “Jenoa” safida spetsiyaliklar darvozasini ishg‘ol qilib, genuyaliklarning g‘alabasiga hissa qo‘shgan.
17-tur doirasidagi so‘nggi uchrashuv hisoblangan “Roma” – “Spetsiya” bahsi 13 dekabr kuni Toshkent vaqti bilan yarim tunda – 00:45 da boshlanadi. “Zamin” yangiliklarini “Vkontakti”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
NATO bosh kotibi Ukrainaning frontdagi ahvoli yomonlashganini tan oldi
Har qanday katta yoshdagi kishi yetuk emas
Erdo‘g‘on Turkiya Isroil bilan aloqalarini uzganini ma’lum qildi
Borrel YEIning Isroil bilan muloqotini to‘xtatishni taklif qildi
Raqobat qo‘mitasi birjada Ai-80 benzini boshlang‘ich narxiga cheklov o‘rnatdi
Blinken Isroildan uchta muammoni hal etishni talab qildi
Shavkat Mirziyoyev: “Falastinlik bolalar va ayollarni beg‘araz davolashga tayyormiz”
Srechko Katanes: "Qanday qilib so‘nggi daqiqada oddiy gol o‘tkazdik, buni bilmayman"
