Vedomosti.ru xabariga ko‘ra, Rossiya hukumati 2026-yildan boshlab smartfon, noutbuk va boshqa elektron qurilmalarga yangi turdagi “texnologik yig‘im” joriy etishni rejalashtirmoqda.
Mazkur yig‘im — mamlakat ichidagi raqamli infratuzilmani rivojlantirish va mahalliy ishlab chiqaruvchilarni qo‘llab-quvvatlash maqsadida kiritiladi. Yig‘im miqdori qurilma import qilinadimi yoki Rossiyada ishlab chiqariladimi — shunga qarab belgilanadi.
Hozircha aniq tarif e’lon qilinmagan, biroq tahlillarga ko‘ra, har bir qurilma uchun 1 000 dan 5 000 rublgacha (140 000 — 700 000 so‘m) yig‘im olinishi mumkin.
Bu yangi to‘lov turining narxlarga ta’siri bo‘lishi kutilmoqda. Xususan, xorijda ishlab chiqarilgan qurilmalar uchun narx oshishi mumkin. Bu esa xaridorlar va savdo tarmog‘i uchun qo‘shimcha yuk bo‘lishi mumkin.
Hukumat ushbu yig‘im yordamida ichki ishlab chiqarishni rag‘batlantirish, texnologik mustaqillikni kuchaytirish va yig‘ilgan mablag‘larni zamonaviy infratuzilma rivojiga yo‘naltirishni ko‘zlamoqda.
Hozircha loyiha muhokama bosqichida, ammo sanoat, texnologiya va iste’molchilar orasida faol bahs-munozaralarga sabab bo‘lmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
