The Sims 4 uzoq yillik qo'llab-quvvatlovi yakuniga yaqinlashayotgani haqidagi gap-so'zlardan so'ng, insayderlar seriyaning keyingi o'yini qanday ko'rinish olishi mumkinligidan darak beruvchi tasvirni qo'lga kiritdi. Ma'lumotlarga ko'ra, yangi loyiha hozircha Project X kod nomi bilan yuritilmoqda. Unda to'liq ochiq dunyo, qahramonlar dizaynini fotorealizmga yaqinlashtirish va hayot simulyatori imkoniyatlarini sezilarli kengaytirish va'da qilinmoqda. Bu haqda playground.ru xabar beradi.
Sims Community portali anonim xat olgan, ichida esa TSX_MATERIAL_SIMS_EXPLORATORY nomli fayl bo'lgan. Skrinshotda to'rtta sim tasvirlangan bo'lib, ularning uslubi The Sims 4 dagi hozirgi stilistikadan ancha farq qiladi. Qahramonlar yanada detalli, soch va kiyim teksturalari sifatliroq ko'rinadi, biroq Maxis ishlariga xos tanish estetika saqlanib qolgan. Rasm taglavhasida esa “Create Beyond Limits” degan shior yozilgan.
Insayderlarning aytishicha, Project X oddiy navbatdagi yangilanish emas, balki mustaqil yakkaxon loyiha. U avval shov-shuv bo'lgan Project Rene dan ajratib olingani aytilmoqda (taxminan The Sims 5). Xabarlarga ko'ra, Electronic Arts tajribani ikki yo'nalishga bo'lishga qaror qilgan: Project Rene ko'proq multipleyer platforma sifatida qoladi, Project X esa yangi avlod uchun syujetga urg'u berilgan o'yin bo'ladi.
Manbalar, shuningdek, 2026 yil The Sims 4 uchun yirik qo'shimchalar borasida yakuniy bosqich bo'lishi mumkinligini ta'kidlaydi. Hali qirollik hayoti mavzusidagi kengaytma chiqishi kutilmoqda, undan keyin esa qo'llab-quvvatlov asosan texnik patchlar va kichik to'plamlar bilan cheklanib qolishi ehtimol.
“Zamin”ni Telegramʻda oʻqing!
