Yil o‘yini unvoni uchun asosiy da’vogarlardan biri sifatida tilga olinayotgan Clair Obscur: Expedition 33 Steam foydalanuvchi reytingida cho‘qqiga chiqa olmadi. Steam250 statistikasi shuni ko‘rsatadiki, 2025 yilda eng yuqori baholar ko‘proq erta kirish bosqichidagi indie loyihalarga nasib etgan. Bu haqda playground.ru xabar beradi.
Ro‘yxatning birinchi pog‘onasini provokatsion kriminal-biznes simulyatori Schedule I egalladi. Ikkinchi o‘rinda kooperativ dahshat janridagi R.E.P.O. qayd etilgan bo‘lsa, uchinchi o‘rin superqahramonlar haqidagi boshqaruv o‘yini Dispatchga nasib qilgan. Clair Obscur: Expedition 33 esa to‘rtinchi qatorda qolib, ko‘lami kichikroq bo‘lsa-da, hamjamiyat tomonidan iliqroq kutib olingan relizlarga yo‘l berdi.
E’tiborlisi, Schedule I mavzusiga yaqin o‘yinlar top-50 ichida yolg‘iz emas: Steam auditoriyasi 2025 yilda xayoliy iqtisodiyotning “soya tomoni”ga urg‘u beradigan bir nechta noodatiy indie loyihalarni ham kutilmaganda yaxshi qabul qilgan.
Shu bilan birga, reyting atrofida bahslar ham bor: ayrim foydalanuvchilar turli formatdagi — simulyator, kooperativ va yakkaxon o‘yinlarni — bir jadvalda taqqoslashni shubha ostiga olmoqda. Boshqalar esa Clair Obscur: Expedition 33 haqidagi fikrini keskin bildirib, “chiroyli ko‘rinsa-da, o‘ziga xos jihati yetishmaydi” deya baholagan.
“Zamin”ni Telegramʻda oʻqing!
