Las-Vegasdagi CES 2026 ko‘rgazmasida Lenovo va Motorola Qira deb nomlangan yangi sun’iy intellekt platformasini e’lon qildi. Kompaniya uni kompyuter, planshet va smartfonlarni bitta ekotizimga bog‘laydigan krossplatforma raqamli yordamchi sifatida ko‘rsatmoqda va Microsoft hamda Google yechimlariga raqobatchi bo‘lishini ta’kidlamoqda. Bu haqda playground.ru xabar beradi.
Qira “ambient” formatdagi AI sifatida — ya’ni alohida ilovani ishga tushirmasdan, operatsion tizim ichiga chuqur singdirilgan holda ishlaydi. U doim faol rejimda ekrandagi vaziyatni tahlil qilib boradi: Next Move funksiyasi foydalanuvchi ehtiyojini oldindan sezishga urinadi, masalan, ovqat suratini ko‘rsa retsept topishni taklif qiladi. Catch Me Up esa o‘tkazib yuborilgan bildirishnomalar va voqealarni qisqa jamlanma ko‘rinishida taqdim etishga mo‘ljallangan.
Xavfsizlik masalasida Lenovo gibrid arxitekturani tanlab, asosan lokal hisoblashga urg‘u berdi. Kompaniya vakillariga ko‘ra, Qira ma’lumotlarning katta qismini qurilmaning o‘zida qayta ishlab, foydalanuvchi odatlari bo‘yicha “tirik model” tuzadi va aniq ruxsatsiz shaxsiy ma’lumotlarni bulutga yubormaydi. Yordamchi e-mail yozish, uchrashuvlarni transkripsiya qilish hamda ulangan gadjetlar o‘rtasida fayllarni boshqarish kabi vazifalarni ham bajaradi.
Shuningdek, Motorola Project Maxwell nomli konseptual taqiladigan qurilmani ham ko‘rsatdi: kamerali aqlli nishon Qira imkoniyatlari orqali atrof-muhit bilan “muloqot” qiladi. U smartfonsiz turib ovozli buyruqlar bilan taksi chaqirish yoki xabar yuborish kabi ishlarni bajarishi mumkin. Qira 2026 yilning birinchi choragidayoq Lenovo kompyuterlarida paydo bo‘lishi, Motorola telefonlariga integratsiya esa keyinroq amalga oshishi kutilmoqda.
“Zamin”ni Telegramʻda oʻqing!
