SamC4r taxallusli dasturchi Booster nomli video xosting platformasini taqdim etdi. Muallif uni YouTube’ga muqobil sifatida ko‘rsatmoqda va eng muhim jihati — loyiha to‘liq ochiq manba kodli: texnik asos Next.js’da qurilgan, fayllar esa GitHub’dagi ommaviy repozitoriyda hamma uchun ochiq. Bu haqda playground.ru xabar beradi.
Booster’ning “yulduzli” funksiyasi — kontent lentasini tomoshabinning o‘zi boshqarishi. Profil sozlamalarida Shorts va TikTok uslubidagi vertikal videolarni butunlay o‘chirib qo‘yish mumkin. Yana bir filtr AI tomonidan yaratilgan deb belgilangan roliklarni yashiradi — sozlama yoqilsa, bunday videolar saytning barcha bo‘limlaridan ko‘rinmay qoladi. Tavsiya tizimi ham “shaffof”: uning ishlash tamoyili va formulasi hujjatlarda ochiq e’lon qilingan.
Tomoshabinni ushlab turish uchun platformaga RPG uslubidagi tizim ham qo‘shilgan. Foydalanuvchilar bir necha soniyalik ixtiyoriy reklama ko‘rish yoki ijtimoiy faollik orqali tajriba ochkolari to‘plashadi, keyin esa ularni ichki do‘konda sarflashadi. Do‘konda akkaunt uchun kosmetik yangilanishlar — noyob nishonlar, unvonlar va masalan retro uslubidagi interfeys mavzulari sotib olinadi.
Ijtimoiy qism ham chetda qolmagan: Booster’da mavzuli hamjamiyatlarga birlashish va ichki chatlarda muloqot qilish mumkin. Kontent yaratuvchilar uchun esa hozirning o‘zida video yuklash, toifa tanlash va statistika ko‘rish kabi bazaviy imkoniyatlar ishlayapti. Loyiha hanuz faol ishlab chiqilmoqda va brauzer orqali foydalanish uchun ochiq.
“Zamin”ni Telegramʻda oʻqing!
