Avvalroq Nvidia RTX 50 Super videokartalarini 2026 yil boshlarida taqdim etishi kutilgandi. Ammo so‘nggi ma’lumotlarga ko‘ra, kompaniya e’tiborini keyingi avlod — RTX 60 seriyasini tayyorlashga burdi. Bu haqda playground.ru xabar beradi.
O‘yin videokartalari bozorida yetakchi bo‘lib turgan Nvidia’ning har bir yangi avlodi millionlab foydalanuvchilar tomonidan intiqlik bilan kutiladi. Shu sababli navbatdagi liniya haqidagi har qanday sizib chiqish yangiliklari darhol muhokamaga sabab bo‘ladi.
Insayder Kopite7kimi xabariga ko‘ra, RTX 60 kartalari GR20x turkumidagi grafik protsessorlar asosida quriladi. Ushbu chip Rubin arxitekturasiga tayanadi — ayni arxitektura kompaniyaning sun’iy intellekt uchun mo‘ljallangan eng yangi GPU’larida ham qo‘llanmoqda.
Qiziq tomoni, Nvidia o‘yin segmentida GR102 chipidan to‘g‘ridan-to‘g‘ri foydalanmasligi mumkin. Insayderning aytishicha, sun’iy intellekt va ma’lumotlar markazlari uchun ishlab chiqilgan GR100 yechimida esa ikki dona GR102 chipi birlashtiriladi.
Shuningdek, Kopite7kimi RTX 60 seriyasi 2027 yilning ikkinchi yarmida start olishini ta’kidlaydi. Bu muddat Nvidia’ga xotira taqchilligi bilan bog‘liq holatni hisobga olish va global talabni qondirish uchun yetarli miqdorda videokarta ishlab chiqarishni yo‘lga qo‘yishga imkon berishi mumkin.
“Zamin”ni Telegramʻda oʻqing!
