Echo Foundry Interactive musiqiy ritm-o‘yinlar janrida yangi loyiha — Sound System’ni taqdim etdi. Loyiha ustida avval Guitar Hero, DJ Hero va Band Hero kabi klassik seriyalarni yaratishda qatnashgan mutaxassislar ishlayotgani aytilmoqda. Mualliflar uni jonli ijro, musobaqa ruhi va hamjamiyat yaratadigan kontentga tayangan “yangi avlod platformasi” sifatida ko‘rmoqda. Bu haqda playground.ru xabar beradi.
Reliz paytida o‘yin gitara, bas-gitara va vokal yo‘nalishlarini qo‘llab-quvvatlaydi, keyinchalik baraban hamda klavishli cholg‘ular ham qo‘shilishi rejalashtirilmoqda. Gameplay ikki rejimga bo‘linadi: Classic — vaqtni “yumshoqroq” talab qiladi va qo‘shiqni muvaffaqiyatsizlik bilan yakunlash mexanikasini o‘chiradi, Pro esa tajribali o‘yinchilar uchun maksimal murakkablikka mo‘ljallangan. Eng katta urg‘u esa ichki editor’ga berilgan — foydalanuvchilar istalgan kuy uchun notalar yo‘lagini o‘zlari tuza oladi.
Sound System shartli bepul modelda tarqatiladi: bazaviy versiya cheklangan treklar to‘plamini beradi va u vaqti-vaqti bilan yangilanib turadi. 34,99 dollar evaziga to‘liq nashrni olish mumkin — unda startdagi 60 ta kompozitsiya hamda turli ichki bonuslar ochiladi. Qo‘shimcha qo‘shiqlar alohida sotiladi, narxi taxminan 1 dollar bo‘lishi kutilmoqda. Dastlabki ijrochilar ro‘yxatidan Drist, Graveyard BBQ va Brian Kahanek kabi, 2000-yillar boshidagi ritm-o‘yinlar muxlislariga tanish nomlar joy oladi.
O‘yin bilan birga Drakong kompaniyasi maxsus InfinaKore Telecaster Edition kontrollerini ham ko‘rsatdi. Gitara modulli tuzilma va murakkab texnikalarni qulayroq ijro etish uchun qayta ishlangan boshqaruv krestovinasi bilan ajralib turadi. Ishlab chiquvchilar Sound System oldingi kontrollerlar, jumladan Riffmaster va Rock Band 4 asboblari bilan ham mos kelishini tasdiqladi. O‘yinning PC versiyasi 2026 yil bahoriga mo‘ljallangan, PlayStation, Xbox va Nintendo Switch uchun esa keyinroq chiqadi.
“Zamin”ni Telegramʻda oʻqing!
