Omdia tadqiqot kompaniyasining yangi hisobotiga ko‘ra, 2025 yilda jahon smartfonlar bozorida yetakchilar uchligi aniq shakllandi: eng yuqori pog‘onada Apple, undan keyin Samsung, uchinchi o‘rinda esa Xiaomi qayd etildi. Qisqasi, raqobat qattiq, lekin liderlik “qo‘ldan qo‘lga” o‘tib ketgani yo‘q.
Hisobotda keltirilishicha, 2025 yil yakunida global bozorda Apple 19 foiz ulush bilan birinchi o‘rinni egallagan. Samsung ham qariyb 19 foiz atrofidagi ko‘rsatkich bilan juda yaqin ta’qibchi bo‘lib turibdi. Xiaomi esa 13 foiz ulush bilan uchinchi o‘rinni mustahkam ushlagan. Ya’ni, yuqoridagi ikkita “gigant” deyarli teng kurash qilayapti, Xiaomi esa o‘z pozitsiyasini sezilarli darajada saqlab qolyapti.
Top-10 ro‘yxatda yana bir qator katta brendlar ham bor: Vivo, Oppo, Transsion, Honor, Lenovo, Huawei va Realme. Bozorda raqobat kengaygani shundan ham bilinadiki, faqat “uchta katta nom” emas, o‘ntalikdagi har bir kompaniya o‘z auditoriyasi uchun alohida strategiya bilan harakat qilyapti.
Yetakchi kompaniyalarning umumiy yetkazib berish ko‘rsatkichi 7 foizga oshgani ham qayd etildi. Eng katta sakrash esa Honor’da kuzatildi: kompaniyaning yetkazib berish hajmi 11 foizga o‘sgan. Bunday o‘sish odatda bitta omilga bog‘lanmaydi — model qatori, narx siyosati, bozorga chiqish tezligi va marketing hammasini qo‘shib hisoblasangiz, natija chiqadi.
Yana bir qiziq jihat: o‘tgan yil davomida jahon smartfonlar bozori 2 foizga o‘sgan. Holbuki, tahlilchilar avvalroq bozor 7 foizga qisqarishi mumkin, deb taxmin qilgan edi. Demak, bozor “o‘ladi” degan gaplar yana erta ekan — odamlar baribir smartfondan voz kechmaydi, faqat tanlovda aqlliroq bo‘lib qolishyapti.
“Zamin”ni Telegramʻda oʻqing!
