Meta kompaniyasining mustaqil kuzatuv kengashi ijtimoiy tarmoqlarda sun'iy intellekt yordamida yaratilgan feyk kontentlar ko'payib borayotganidan xavotir bildirdi. Kengash a'zolarining ta'kidlashicha, kompaniya bunday yolg'on ma'lumotlarga qarshi kurashishda yetarli choralar ko'rmayapti. Bu haqda bbc.com xabar beradi.
Bunga o'tgan yilning iyun oyida Facebook tarmog'ida tarqalgan sun'iy intellekt orqali yasalgan video sabab bo'ldi. Filippindagi soxta yangiliklar sahifasi tomonidan yuklangan ushbu videoda Eron kuchlari Isroilning Xayfa shahriga jiddiy zarar yetkazgani aks etgan edi. Video qisqa vaqt ichida 1 millionga yaqin ko'rishlar sonini to'plagan bo'lishiga qaramay, Meta unga hech qanday belgi qo'ymagan va o'chirib tashlamagan.
Hozirgi kunda Meta asosan foydalanuvchilarning o'zlari sun'iy intellekt mahsulotini yuklayotganini tan olishiga yoki boshqalarning shikoyat qilishiga tayanadi. Kompaniya dastlab yuqoridagi videoni jismoniy xavf tug'dirmagani uchun qoidalarga zid emas deb baholagan edi. Biroq kuzatuv kengashi bu yondashuvni keskin tanqid qilib, ayniqsa harbiy mojarolar va inqirozlar davrida feyk videolarni aniqlash tizimi juda zaif ekanligini ma'lum qildi.
Kengashning ogohlantirishicha, global mojarolar haqidagi soxta videolar odamlarning haqiqatni yolg'ondan ajratish qobiliyatiga salbiy ta'sir ko'rsatadi va barcha ma'lumotlarga nisbatan ishonchsizlikni keltirib chiqaradi. Shu sababli, Meta sun'iy intellekt yordamida yaratilgan xavfli kontentlarni faol ravishda va tezkorlik bilan belgilab borishi talab etiladi.
Tanqidlardan so'ng Meta kompaniyasi ushbu videoga yetti kun ichida maxsus belgi qo'yishini va kelajakda shunga o'xshash holatlarda kengash tavsiyalariga amal qilishini bildirdi. Eslatib o'tamiz, Meta o'zining Facebook, Instagram va WhatsApp kabi platformalarida kontent nazoratini ta'minlash maqsadida 2020 yilda ushbu yarim mustaqil kuzatuv kengashini tashkil etgan edi.
“Zamin”ni Telegramʻda oʻqing!
