Meta kompaniyasining biznes uchun mo'ljallangan sun'iy intellekt vositalari mart oyi oxiriga kelib haftasiga 10 millionga yaqin suhbatni amalga oshirdi. Bu ko'rsatkich yil boshida atigi 1 millionni tashkil etgan edi. Bu haqda Techcrunch.com xabar beradi.
Hozirgi kunda 8 milliondan ortiq reklama beruvchilar kompaniyaning kamida bitta sun'iy intellekt vositasidan foydalanmoqda. Ushbu vositalar hozircha kichik biznes vakillari uchun bepul taqdim etilmoqda.
Kompaniya rahbari Mark Sukerberg kelajakda bu xizmatlar pullik bo'lishi mumkinligini ta'kidladi. Uning so'zlariga ko'ra, xabar almashish ilovalaridagi biznes sun'iy intellekti hozircha bepul bo'lsa-da, uzoq muddatli monetizatsiya modeli ustida ish olib borilmoqda.
Meta o'zining biznes mahsulotlariga sun'iy intellekt imkoniyatlarini joriy etishda davom etmoqda. Xususan, o'tgan yili tashkil etilgan Meta Superintelligence Labs bo'limi tomonidan yaratilgan Muse Spark modeli ishga tushirildi.
Birinchi chorak yakunlariga ko'ra, Meta kompaniyasining sof foydasi 26,8 milliard dollarni tashkil etdi. Umumiy daromad esa o'tgan yilga nisbatan 33 foizga o'sib, 56,3 milliard dollarga yetdi.
“Zamin”ni Telegramʻda oʻqing!
