Internetdagi yoshni tekshirish tizimlari bolalar uchun toʻsiq boʻla olmayapti. Buyuk Britaniyaning Internet Matters notijorat tashkiloti oʻtkazgan soʻrovnomaga koʻra, bolalarning yarmi yosh cheklovlarini chetlab oʻtish juda oson ekanligini taʼkidlagan. Eng qiziq usullardan biri — yuzga kosmetik qalam bilan soxta moʻylov chizishdir. Bu usul sunʼiy intellektga asoslangan tekshiruv vositalarini chalgʻitib, bolani kattalar deb oʻylashiga sabab boʻlmoqda. Bu haqda Techcrunch.com xabar beradi.
Dunyo boʻylab yoshni tekshirish qonunlari joriy etilmoqda. Koʻpincha bu jarayon foydalanuvchilardan haydovchilik guvohnomasi yoki pasport nusxasini uchinchi tomon kompaniyalariga yuklashni talab qiladi. Tanqidchilar esa bunday maʼlumotlar bazasi xakerlik hujumlari uchun xavfli ekanligini va internet erkinligiga tahdid solishini aytishmoqda.
Apple kabi texnologiya gigantlari qonunlarga moslashish uchun oʻz qurilmalariga yangilanishlarni joriy etdi. Reddit va Meta kabi platformalar esa hujjatlarni talab qilish yoki algoritmlar yordamida foydalanuvchi yoshini taxmin qilish usullaridan foydalanmoqda. Discord kabi boshqa xizmatlar esa foydalanuvchilarning noroziligi va xavfsizlik muammolari tufayli bu jarayonni kechiktirishga majbur boʻldi.
Bolalar yoshni tekshirish tizimlarini aldashning boshqa yoʻllarini ham topishgan. Masalan, veb-kamerani videooʻyinlardagi kattalar qiyofasidagi personajlarga qaratish yoki gʻalati yuz ifodalarini qilish orqali tizimni chalgʻitish holatlari kuzatilmoqda. Bu esa joriy etilayotgan texnologik himoya vositalarining samaradorligini shubha ostiga qoʻymoqda.
“Zamin”ni Telegramʻda oʻqing!
