Huawei Watch Fit 5 Pro global bozorga chiqdi: 10 kungacha quvvat va EKG funksiyasi

Huawei kompaniyasi o‘zining yangi Watch Fit 5 Pro aqlli soatlarini global bozorga taqdim etdi. Ishlab chiqaruvchi ushbu modelni Apple Watch Ultra 3 bilan bevosita raqobatchi sifatida ko‘rsatmoqda. Bu haqda Ixbt.com xabar beradi.

Qurilma 1,92 dyuymli AMOLED displey bilan jihozlangan bo‘lib, ekran atrofidagi hoshiyalar qalinligi atigi 1,8 mm ni tashkil etadi. Displey 3000 nit yorqinlikka ega va chizilishlarga chidamli sapfir shisha bilan himoyalangan.

Soatning asosiy afzalliklaridan biri uning quvvat sarfidir: oddiy rejimda 10 kungacha, faol foydalanilganda esa 7 kungacha quvvat saqlab qoladi. Yangi TrueSense tizimi EKG, yurak urish tezligi, qondagi kislorod miqdori (SpO2), uyqu sifati va stress darajasini aniq kuzatish imkonini beradi.

Sport ixlosmandlari uchun 100 dan ortiq mashg‘ulot rejimlari hamda Strava va FiiT kabi xizmatlar bilan integratsiya mavjud. Shuningdek, Mini-workout partner funksiyasi orqali istalgan vaqtda 30 ta qisqa mashq turini bajarish mumkin.

Yevropa bozorida Huawei Watch Fit 5 Pro 300 yevro narxida sotuvga chiqarildi va uch xil rang tanlovida taqdim etilmoqda.

Nodirbek Razzokov

«ZAMIN.UZ» muharriri

+ Zamin.uz saytini Google'ga qo'shing