OpenAI kompaniyasi ChatGPT foydalanuvchilarining xavfsizligini taʼminlash maqsadida Trusted Contact nomli yangi funksiyani ishga tushirdi. Ushbu yangilik foydalanuvchi oʻziga zarar yetkazish niyatini bildirgan taqdirda, uning yaqinlariga avtomatik tarzda ogohlantirish yuborish imkonini beradi. Endilikda kattalar oʻz hisoblariga ishonchli shaxsni biriktirib qoʻyishlari mumkin. Bu haqda Techcrunch.com xabar beradi.
Agar sunʼiy intellekt bilan suhbat jarayonida xavfli holatlar aniqlansa, ChatGPT foydalanuvchini ushbu shaxs bilan bogʻlanishga chaqiradi. Shu bilan birga, tanlangan yaqin kishiga elektron pochta, SMS yoki ilova orqali xabar yuboriladi. Kompaniya foydalanuvchi maxfiyligini saqlash maqsadida xabarlarda suhbatning batafsil mazmunini oshkor qilmaslikka qaror qildi.
Mazkur qadam OpenAI kompaniyasiga nisbatan bildirilgan tanqidlar va sud daʼvolari fonida amalga oshirilmoqda. Avvalroq baʼzi oilalar ChatGPT yaqinlarining oʻz joniga qasd qilishiga sababchi boʻlganini daʼvo qilgan edi. Hozirda kompaniya ushbu xavfli signallarni avtomatlashtirilgan tizim va insonlardan iborat xavfsizlik guruhi yordamida nazorat qiladi.
Kompaniya vakillarining soʻzlariga koʻra, xavfsizlik boʻyicha bildirishnomalar bir soatdan kamroq vaqt ichida koʻrib chiqiladi. Trusted Contact funksiyasi ixtiyoriy xarakterga ega boʻlib, u oʻtgan yili joriy etilgan ota-onalar nazorati tizimining mantiqiy davomi hisoblanadi. OpenAI kelgusida ham shifokorlar va tadqiqotchilar bilan hamkorlikda AI tizimlarining inqirozli vaziyatlardagi javob choralarini takomillashtirishni rejalashtirmoqda.
“Zamin”ni Telegramʻda oʻqing!
