Germaniyaning avtomobil ishlab chiqaruvchi giganti Porsche savdo hajmining pasayishi va foydaning kamayishi fonida oʻzining uchta shoʻba korxonasini yopishini eʼlon qildi. Eng koʻzga koʻringan yoʻqotish bu batareyalar ishlab chiqaruvchi Cellforce Group boʻlib, kompaniya endilikda oʻz batareyalarini ishlab chiqarishdan voz kechib, tashqi yetkazib beruvchilarga tayanishga qaror qildi. Bu haqda Techcrunch.com xabar beradi.
Shuningdek, elektr velosipedlar uchun uzatmalar tizimini ishlab chiquvchi Porsche eBike Performance hamda Volkswagen Group uchun dasturiy taʼminot bilan shugʻullanuvchi Cetitec kompaniyalari ham faoliyatini toʻxtatadi. Ushbu qaror natijasida 500 dan ortiq xodim ish oʻrnini yoʻqotadi.
Porsche bosh direktori Michael Leiters kompaniyaning asosiy biznes yoʻnalishlariga qaytishi va strategik jihatdan qayta shakllanishi zarurligini taʼkidladi. Kompaniya rahbariyati Porscheʼni yanada chaqqon va samaraliroq qilish uchun xarajatlarni qisqartirishga majbur boʻlmoqda.
Kompaniya soʻnggi vaqtlarda Shimoliy Amerika, Xitoy va Yevropa bozorlarida sotuvlar hajmi keskin pasayganidan aziyat chekmoqda. Xususan, Xitoy bozorida yetkazib berish hajmi 21 foizga qisqargan. Porsche ushbu qiyinchiliklarni elektr transport vositalariga oʻtish jarayonidagi muammolar bilan bogʻlamoqda.
“Zamin”ni Telegramʻda oʻqing!
