AQSh prezidenti Donald Trump Xitoyga amalga oshirayotgan tashrifi doirasida o‘zi bilan birga 16 nafar yirik biznes vakillarini olib ketmoqda. Reuters agentligi xabariga ko‘ra, delegatsiya tarkibidan Tesla va SpaceX rahbari Elon Musk, Apple bosh direktori Tim Cook, Boeing rahbari Kelly Ortberg hamda GE Aerospace kompaniyasi boshlig‘i Larry Culp o‘rin olgan. Bu haqda Ixbt.com xabar beradi.
Ushbu uchrashuv Vashington va Pekin o‘rtasidagi savdo aloqalarini qayta tiklash hamda ikki mamlakat o‘rtasidagi taranglikni yumshatishga qaratilgan. Tomonlar yangi savdo forumlarini tashkil etish va qishloq xo‘jaligi mahsulotlari, energiya resurslari hamda aviatsiya texnikalarini yetkazib berish bo‘yicha kelishuvlarni kengaytirishni muhokama qilmoqda.
Boeing kompaniyasi uchun bu tashrif alohida ahamiyatga ega. Xitoy 2017-yildan buyon ilk bor Boeing samolyotlariga, jumladan 500 tagacha 737 MAX va o‘nlab keng fyuzelyajli laynerlarga buyurtma berishi mumkin. Shuningdek, savdo urushidagi vaqtinchalik sulhni uzaytirish va nodir metallar yetkazib berish masalalari ham kun tartibida turibdi.
Qizig‘i shundaki, Nvidia rahbari ushbu delegatsiya tarkibiga kiritilmadi. Oq uy hozirgi bosqichda asosiy e’tiborni aviatsiya va agrosektorga qaratmoqda, chunki aynan shu sohalarda eng yirik bitimlar imzolanishi kutilmoqda.
“Zamin”ni Telegramʻda oʻqing!
