OpenAI bosh direktori Sam Altman o‘zining sobiq hammuassisi Elon Musk tomonidan kompaniya korporativ tuzilmasiga qarshi qo‘zg‘atilgan sud ishida ilk bor ko‘rsatma berdi. Musk OpenAI rahbariyatini notijorat tashkilotni «o‘g‘irlashda» va uni foyda keltiruvchi tuzilmaga aylantirishda ayblamoqda. Altman bu ayblovlarni rad etib, kompaniya dunyodagi eng yirik xayriya tashkilotlaridan birini yaratganini va uning faoliyati insoniyat uchun muhimligini ta'kidladi. Bu haqda Techcrunch.com xabar beradi.
Sud jarayonida Altman 2017-yilda yuz bergan keskin vaziyatni esladi. O‘sha paytda sun'iy intellekt modellarini moliyalashtirish masalasi muhokama qilinayotganda, Elon Musk agar u vafot etsa, OpenAI nazorati uning farzandlariga o‘tishi kerakligini aytgan. Altman bu taklifdan xavotirga tushganini, chunki kompaniya sun'iy intellektni bir shaxs qo‘lida to‘plamaslik tamoyiliga asoslanganini qayd etdi.
Altman, shuningdek, Muskning boshqaruv uslubi tadqiqot laboratoriyasi uchun mos kelmaganini ta'kidladi. Uning so‘zlariga ko‘ra, Muskning xodimlarni reyting bo‘yicha saralash va ularni ishdan bo‘shatish talabi kompaniya madaniyatiga uzoq vaqt davomida jiddiy zarar yetkazgan. Altman o‘zini Greg Brockman va Ilya Sutskever kabi hammuassislarning mehnatini himoya qiluvchi shaxs sifatida ko‘rsatdi.
OpenAI direktorlar kengashi raisi Bret Taylor esa kompaniyaning qayta tuzilishi va moliyaviy masalalari bo‘yicha izoh berdi. Uning aytishicha, kompaniya aksiyalarini naqd pulga aylantirishdagi qiyinchiliklar 2025-yildagi so‘nggi restrukturizatsiya orqali hal etilgan. Sudda asosiy bahs kompaniyaning tijoriy qudrati o‘sishi bilan birga xavfsizlik masalalari ortda qolib ketganmi degan savol atrofida kechmoqda.
“Zamin”ni Telegramʻda oʻqing!
