Elon Muskga tegishli xAI kompaniyasi Missisipi shtatidagi maʼlumotlar markazida 50 ga yaqin tabiiy gaz turbinalarini ishlatmoqda. Ushbu elektr stansiyalari shtat qonunchiligidagi boʻshliq tufayli nazoratsiz qolgan, chunki ular maxsus tirkamalarda joylashtirilgani uchun "mobil" qurilmalar sifatida tasniflanadi. Bu haqda Techcrunch.com xabar beradi.
Ushbu holat atrof-muhitga zarar yetkazayotgani sababli NAACP tashkiloti sudga murojaat qildi. Daʼvogarlarning fikricha, turbinalardan chiqayotgan zararli moddalar allaqachon ifloslangan hududdagi havo sifatini yanada yomonlashtirmoqda. Tashkilot sud orqali xAI faoliyatini vaqtincha toʻxtatishni talab qilmoqda.
Southern Environmental Law Center yuristlari turbinalarning "mobil" deb atalishi federal qonunlarga zid ekanligini taʼkidlamoqda. Qonunchilikka koʻra, tirkamaga oʻrnatilgan elektr stansiyalari ham statsionar qurilma hisoblanishi va tegishli ekologik meʼyorlarga rioya qilishi shart.
Hozirgi vaqtda xAI kompaniyasi 46 ta turbinani ishlatmoqda, garchi ulardan atigi 15 tasiga rasmiy ruxsatnoma berilgan boʻlsa ham. Kompaniya avvalroq turbinalarning bir qismi vaqtinchalik ekanligini bildirgan boʻlsa-da, amalda ularning soni ortib bormoqda.
“Zamin”ni Telegramʻda oʻqing!
