Samsung Galaxy A55 va Galaxy A54 uchun yangi xavfsizlik yangilanishi chiqdi

Samsung kompaniyasi o‘zining o‘rta segmentdagi mashhur modellari — Galaxy A55 va Galaxy A54 smartfonlari uchun may oyi xavfsizlik yangilanishini taqdim etdi. Ushbu yangilanish tizimdagi 36 ta turli xil zaifliklarni bartaraf etishga qaratilgan. Bu haqda Ixbt.com xabar beradi.

Galaxy A55 uchun mo‘ljallangan yangilanish hozirda Yevropa hududida tarqatilmoqda va u A556BXXSECZDE proshivka raqamiga ega. Galaxy A54 uchun esa yangi patch xalqaro versiyalar, xususan, Osiyo va Yaqin Sharq mamlakatlari, jumladan, Hindiston va Saudiya Arabistoni foydalanuvchilari uchun chiqarildi. Ushbu versiyaning hajmi 286,79 MB ni tashkil etadi.

Odatda Samsung o‘zining yangi va qimmatbaho flagman modellariga ustunlik beradi, biroq bu safar kompaniya Galaxy A turkumidagi qurilmalarni ham tezkorlik bilan yangilashga muvaffaq bo‘ldi. Boshqa mintaqalardagi foydalanuvchilar ushbu yangilanishni yaqin haftalar ichida qabul qilib olishlari kutilmoqda.

Kelajakda Galaxy A55 va Galaxy A54 egalarini yirik yangilanishlar kutmoqda. Qurilmalar bosqichma-bosqich One UI 8.5 hamda Android 17 bazasidagi One UI 9.0 interfeysiga yangilanishi rejalashtirilgan.

Abror Shuhratov

«ZAMIN.UZ» muharriri

+ Zamin.uz saytini Google'ga qo'shing