Google tomonidan qo‘llab-quvvatlanayotgan Fervo kompaniyasi qiymati 10 milliard dollarga yetdi
Geotermal energetika sohasida faoliyat yurituvchi Amerika kompaniyasi Fervo Energy Nasdaq birjasiga chiqqanidan so‘ng o‘z qiymatini 10 milliard dollardan oshirdi. IPO jarayonida kompaniya aksiyalari 30 foizdan ko‘proqqa qimmatlashdi va 1,89 milliard dollar mablag‘ jalb qilindi. Bu 2013-yildan buyon AQSh energetika sektoridagi eng yirik ommaviy joylashtirish bo‘ldi. Bu haqda Ixbt.com xabar beradi.
Bunday muvaffaqiyatning asosiy sababi sun’iy intellekt sanoatining jadal rivojlanishi bilan bog‘liq. ChatGPT kabi texnologiyalarni qo‘llab-quvvatlovchi ma’lumotlar markazlari va hisoblash klasterlari uzluksiz hamda barqaror elektr energiyasiga bo‘lgan talabni keskin oshirmoqda. Fervo kompaniyasi esa o‘zining ilg‘or geotermal tizimlari (EGS) orqali aynan shu ehtiyojni qondirishga qaratilgan yechimlarni taklif etmoqda.
Google kompaniyasi Fervo bilan yaqin hamkorlik o‘rnatgan bo‘lib, 2024-yilda Nevada shtatidagi ma’lumotlar markazlarini 100 MW energiya bilan ta’minlash bo‘yicha shartnoma imzoladi. Shuningdek, Google kompaniyaning 462 million dollarlik moliyalashtirish bosqichiga boshchilik qilgan. Fervoning Yuta shtatidagi Cape Station loyihasi 2028-yilga borib 500 MW quvvatga yetishi va dunyodagi eng yirik EGS-loyihasiga aylanishi kutilmoqda.
Texnologiya gigantlari uglerodsiz energiya manbalariga bo‘lgan ehtiyojni qondirish uchun geotermal energetikaga tobora ko‘proq sarmoya kiritmoqda. Google’dan tashqari, Microsoft va Meta ham ushbu yo‘nalishda faol ishlamoqda. Microsoft Yangi Zelandiya va Keniya loyihalariga sarmoya kiritgan bo‘lsa, Meta ham o‘zining energiya ta’minotini diversifikatsiya qilish uchun geotermal kompaniyalar bilan shartnomalar imzolagan.
“Zamin”ni Telegramʻda oʻqing!
