Microsoft kompaniyasi Samsung Gallery ilovasi va OneDrive bulutli xizmati oʻrtasidagi integratsiya yakunlanishini rasman eʼlon qildi. Mazkur oʻzgarishga koʻra, 2026-yil 30-sentabrdan boshlab foydalanuvchilar oʻz foto va videolarini zaxiralash uchun Samsung Gallery ilovasini OneDrive hisobiga bogʻlay olmaydilar. Bu haqda Ixbt.com xabar beradi.
Ushbu funksiyadan foydalanib kelayotgan shaxslarga sozlamalarni yangilash va zaxira nusxalarini yaratishni davom ettirish uchun OneDrive rasmiy ilovasiga oʻtish tavsiya etilmoqda. Microsoft oʻz ilovasi orqali maʼlumotlarni saqlashni sozlash boʻyicha bosqichma-bosqich koʻrsatmalarni taqdim etdi.
Shuni taʼkidlash joizki, foydalanuvchilar hali ham OneDrive ilovasi orqali mediafayllarni bulutga yuklash imkoniyatiga ega boʻladilar, biroq Samsung Gallery bilan toʻgʻridan-toʻgʻri sinxronizatsiya toʻxtatiladi. Bu ikki platforma oʻrtasidagi uzoq yillik hamkorlikning muayyan qismi yakunlanayotganidan dalolat beradi.
Microsoft vakillarining taʼkidlashicha, 2026-yil 30-sentabrdan keyin Samsung Gallery ilovasi OneDrive bilan suratlarni sinxronizatsiya qilmaydi. Shuningdek, OneDrive bulutida saqlanayotgan barcha suratlar Samsung Gallery ilovasi interfeysidan gʻoyib boʻladi, biroq bulutli xizmatning oʻzida saqlanib qoladi.
“Zamin”ni Telegramʻda oʻqing!
