Sochlar salomatligi va tezroq o‘sishi uchun foydali mahsulotlar

^{Foto: Behance.net}
Sog‘lom, qalin, uzun va jilvador sochlar hamisha ayol salomatligi va go‘zalligining timsoli bo‘lib kelgan. Afsuski, hammamiz xam shunday sochlar bilan maqtana olmaymiz. Buning sababi bir tomondan salomatlik, irsiy moyillikka borib taqalsa, ikkinchi tomondan o‘zimizning e’tiborsizligimiz, noto‘g‘ri parvarishdir. Quyida sochlar o‘sishini rag‘batlantirish va sinishining oldini olish bo‘yicha tavsiyalar bilan bo‘lishamiz.

Nima uchun ba’zi insonlarning sochlari tez o‘sadi, boshqalarda esa sekin?
Asosiy sabablar:
- genetika;
- gormonal holat;
- barqaror psixika, asabiylashmaslik;
- yaxshi parvarish.

Kuniga 50-100 tagacha soch tolasining to‘kilishi norma hisoblanadi. Sochlar har oyda o‘rtacha 1-2 santimetrga o‘sadi. Bu jarayon ichkaridan sodir bo‘lganligi sababli, to‘g‘ri ovqatlanish qoidalari bilan vaziyatni yumshatish mumkin.

Sochlar 78 foiz keratin oqsilidan iborat. Shuning uchun aminokislotali mahsulotlar iste’mol qilish sochlarning yaxshi o‘sishiga yordam beradi. Ularga baliq, dengiz mahsulotlari, go‘sht (mol, quyon), parranda go‘shti (tovuq, kurka, o‘rdak) tuxum va dukkaklilar (no‘xat, loviya, mosh) kiradi.

Sochlar tezroq o‘sishi uchun A, B, E, D kabi vitaminlar guruhlari, mikroelementlar: sink, oltingugurt, mis, temir, selen, yod, kremniy, magniy va yog‘ kislotalari barcha hujayra membranalarini barqarorlashtirishda zarurdir.

^{Foto: Getty Images}
V vitaminlariga boy mahsulotlar ham soch ildizini mustahkamlaydi, ularga donli mahsulotlar, yong‘oqlar, dukkaklilar, ko‘katlar va karam kiradi.

Biotin (B7 vitamini) esa tuxum, dengiz mahsulotlari, dukkaklilar, yong‘oqlar, shirin kartoshka, brokkoli, avokado, qulupnay, malina va qo‘ziqorinlar tarkibida mavjud.

D vitamini yog‘li baliq mahsulotlari, yovvoyi qizil ikra, skumbriya, paltus, treska jigari, sariyog‘, tuxum sarig‘i va qo‘ziqorinda ko‘p uchraydi.

A va E vitaminlarini mol go‘shti, jigar, avokado, tuxum, baliq, sut mahsulotlari va pishloqdan olish mumkin.

Omega-3 yog‘ kislotalariga yog‘li baliq, dengiz mahsulotlari, mol go‘shti, tuxum, yong‘oqlar, chia urug‘i boydir.

Mis quyidagi mahsulotlarda uchraydi: hayvon va baliq jigari, dengiz mahsulotlari, dukkaklilar, yong‘oqlar, ismaloq, lavlagi, pomidor, sabzi, karam va ko‘katlar.

Sochlar tezroq o‘sishi uchun nima qilish kerak?

^{Foto: Pinterest}
Ekspertlar ta’kidlashicha, sochlar — organizm salomatligini ko‘rsatuvchi tashqi belgilarning asosiysi. Ko‘p soch to‘kilishi endokrinolog ko‘rigiga borish uchun asos bo‘la oladi. Shifokor gipoterioz, insulin rezistentlik, gormonal buzilishlar kabi kasalliklar mavjudligini aniqlashi lozim.

Shuningdek, stress holatlarini hayotingizda kamaytirish tavsiya etiladi, albatta, bu doim ham o‘z qo‘limizda bo‘lavermaydi. Hech bo‘lmasa sport bilan shug‘ullanish, sog‘lom uyqu kabilarni yoddan ko‘tarmaslik ham asablarni “yumshatadi” va sochlarda namoyon bo‘ladi. “Zamin” yangiliklarini “Odnoklassniki”da kuzatib boring