Endokrinolog: bunday alomatlar kuzatilsa, zudlik bilan gormonlarni tekshirtirish lozim

Endokrin tizim gormonlar ishlab chiqaradigan va organizmda sodir bo‘ladigan hayotiy jarayonlarni tartibga soladigan ichki sekretsiya bezlari markazidir. Qalqonsimon bez asab va immun tizimlari bilan bog‘liq holda ishlaydi.

^{Foto: Flestone}
Bu jarayonlarning buzilishi jiddiy kasalliklarga olib keladi. Kasallik kuchayib ketmasidan avval endokrinolog shifokor bilan maslahatlashish, uning salbiy oqibatlari oldini olish zarur.

Quyidagi alomatlar qalqonsimon bez bilan bog‘liq muammolardan darak beradi:

- bo‘yin old qismida noqulaylik his qilish;
- tomoqda shish paydo bo‘lishi;
- charchoqning kun sayin kuchayib borishi, zaiflik;
- titroq, yurak tez urishi;
- ko‘p terlash yoki aksincha terining quruqlashib ketishi;
- tana vaznining keskin ortishi yoki kamayishi;
- apatiya, depressiya, jahldorlik va asabiylik kuzatilishi;
- sochlar to‘kilishi yoki tanada ortiqcha tuklar paydo bo‘lishi;
- yuzga besabab husnbuzarlar toshishi;
- og‘iz bo‘shlig‘ining qurishi, doimiy chanqoq;
- tez-tez bosh og‘rishi va uyqusizlik.

Yuqoridagi belgilardan bir nechtasi kuzatilishi qalqonsimon bezning disfunksiyasi va endokrin tizimda buzilishlarni anglatishi mumkin.

^{Foto: Imhub}
Qalqonsimon bez funksiyasining buzilishi jiddiy oqibatlariga, jumladan: hayz davrining keskin o‘zgarishi, bepushtlik, libidoning pasayishi, amenoreya (6 oydan ortiq muddat hayz ko‘rmaslik) kabi noxush alomatlarga olib keladi. Shuning uchun o‘z vaqtida shifokor ko‘rigidan o‘tib turish, sog‘liqqa g‘amxo‘rlik qilish nihoyatda muhimdir. “Zamin” yangiliklarini “Vkontakti”da kuzatib boring