Veyplar sigaretadan 20 baravar xavfli ekani aniqlandi

Amerika olimlari olib borgan so‘nggi tadqiqotlar veyp — ya’ni elektron sigaretalarning inson salomatligi uchun qanchalik katta xavf solishini yana bir bor tasdiqladi. Ularning xulosalariga ko‘ra, veyplar an’anaviy tamaki mahsulotlariga nisbatan 20 baravar ko‘proq zarar keltirishi mumkin.

Elektron sigareta sifatida tanilgan bu qurilmalar maxsus suyuqlikni bug‘ shaklida nafasga tortish imkonini beradi. Bir qarashda zararsiz va "dimog‘bop" ko‘rinadigan bu uskunalar o‘z ichida jiddiy xatarlarni jamlagan.

Og‘ir metallar va zaharli moddalar konsentratsiyasi juda yuqori
Tadqiqot natijalari shuni ko‘rsatdiki, veyplardagi bug‘ tarkibida qo‘rg‘oshin, nikel, surma kabi og‘ir metallar miqdori me’yordan ancha ortiq. Bu moddalar tananing ichiga sekin-asta to‘planadi va vaqt o‘tishi bilan salomatlikka qaytarib bo‘lmas ziyon yetkazadi.

Jiddiy kasalliklar xavfi ortadi
Olimlar ta’kidlashicha, veypdan muntazam foydalanish:
- demans (aqliy qobiliyatning pasayishi),
- o‘pka fibrozlari va nafas yo‘llari muammolari,
- turli xil saraton turlari kabi og‘ir xastaliklarni yuzaga keltirishi mumkin.

Bundan tashqari, elektron sigaretalarga berilish insonda nikotinga qaramlikni kuchaytirishi, asab tizimini izdan chiqarishi va qon aylanishiga salbiy ta’sir ko‘rsatishi mumkin.

Yoshlar orasida tarqalishi xavotirli darajada
Ko‘plab mamlakatlarda, jumladan, AQSHda ham elektron sigaretalar yoshlar orasida ommalashgani xavotir uyg‘otmoqda. Chunki bu kabi qurilmalarning tashqi ko‘rinishi, turli ta’mlardagi bug‘lari va reklama orqali targ‘ib qilinishi yoshlar ongiga "zararsiz" ekan degan fikrni singdiradi.

Xulosa: “zamonaviy” deb qabul qilingan veyplar shunchalik behavotar emas
Olimlar va shifokorlar bu kabi qurilmalarni iste’mol qilmaslik, ayniqsa yoshlar orasida uning oldini olish bo‘yicha keng qamrovli targ‘ibot ishlarini olib borishni tavsiya qilishmoqda. Chunki veyp — bu sigaretalarning xavfsiz alternativasi emas, balki yanada xatarli, zamonaviy qiyofadagi yangi tahdiddir. “Zamin”ni Telegramʻda oʻqing!