Bolalar salomatligi har bir ota-ona uchun eng muhim masala hisoblanadi. Ayniqsa, kichik yoshda ularga qanday ovqat va ichimlik berish kerakligiga jiddiy e’tibor qaratish zarur. Mutaxassislar ta’kidlashicha, yetti yoshgacha bo‘lgan bolalarga gazlangan suvni mutlaqo ichirish mumkin emas.
Gazli suv tarkibida karbonat angidrid moddasi mavjud bo‘lib, u ichimlikka mayda pufakchalar va o‘ziga xos nordon ta’m beradi. Kattalar uchun u ayrim hollarda zararsizdek ko‘rinsa-da, bola organizmida butunlay teskari ta’sir ko‘rsatadi.
Nega gazlangan suv xavfli?
-
Qorin shishishi va dam bo‘lishi – bolalarning hali rivojlanish jarayonida bo‘lgan oshqozon-ichak tizimi gazli ichimlikka chidamli emas.
-
Kislotalilik oshishi – gaz suvi oshqozon shilliq qavatiga qattiq ta’sir qilib, uning kislotaliligini ko‘paytiradi.
-
Terida noqulaylik – ba’zi hollarda qichishish va allergiyaga o‘xshash belgilar ham kuzatilishi mumkin.
Nima ichish tavsiya etiladi?
Mutaxassislar fikricha, bolalar uchun eng to‘g‘ri tanlov – gazsiz mineral suv. U nafaqat chanqoqni tez qondiradi, balki tanani zarur mineral moddalar bilan ham ta’minlaydi. Shu bilan birga, uning hech qanday nojo‘ya ta’siri yo‘q.
Ota-onalar har doim bola salomatligini ustuvor qo‘yishi, ularni zarar keltirishi mumkin bo‘lgan ichimliklardan ehtiyot qilishi lozim. Chunki bolalikda yo‘l qo‘yilgan kichik xatolar kelajakda katta muammolarga aylanishi mumkin.
“Zamin”ni Telegramʻda oʻqing!
