Tuxum sog‘lom ovqatlanishning ajralmas qismi sanaladi. Biroq uning qaynatilgan holda ortiqcha iste’moli ayrim hollarda inson salomatligiga salbiy ta’sir ko‘rsatishi mumkin.
Avvalo, tuxum sarig‘i tarkibidagi xolesterin miqdori yuqori. Agar uni ko‘p miqdorda tanovul qilinsa, qon tomirlarda xolesterin to‘planishiga va yurak-qon tomir xastaliklari xavfini oshirishga sabab bo‘lishi mumkin.
Shuningdek, ayrim odamlarda tuxumga nisbatan allergiya holatlari kuzatiladi. Bunda terida toshmalar, qichishish yoki oshqozon-ichak bezovtaligi ro‘y berishi mumkin.
Ortiqcha qaynatilgan tuxumni iste’mol qilish ba’zi kishilarda hazm qiyinlashishiga va og‘irlik hissiga olib keladi. Shu bois vrachlar tuxumni me’yorda — kuniga 1-2 donadan oshirmaslikni tavsiya etadi.
Albatta, qaynatilgan tuxum umumiy holatda foydali taom hisoblansa-da, homilador ayollar, emizikli onalar va kichik yoshdagi bolalar uchun ba’zi salbiy jihatlari ham bor.
Homilador ayollar uchun:
- Salmonella xavfi: tuxum yetarli darajada pishirilmasa, bakteriyalar infeksiyaga olib kelishi mumkin. Bu homilador ayollar uchun juda xatarli.
- Xolesterin ortiqcha bo‘lsa, qon bosimini oshirishi va yurak-qon tomir tizimiga salbiy ta’sir qilishi mumkin.
Emizikli onalar uchun:
- Tuxum ayrim onalarda allergiyaga olib kelishi mumkin va bu holat sut orqali chaqaloqqa ham ta’sir qilishi ehtimoldan xoli emas.
- Ortiqcha iste’mol qilinganda hazm og‘irlashishi, yallig‘lanish jarayonlarini kuchaytirishi mumkin.
Yosh bolalar uchun:
- Bir yoshga to‘lmagan chaqaloqlarga tuxum berish tavsiya etilmaydi, chunki ularda allergiya xavfi yuqori.
- Ko‘p miqdorda iste’mol qilinsa, bolalarda ich qotishi yoki hazm qiyinlashishi mumkin.
Shu bois vrachlar homiladorlar va emizikli onalarga tuxumni to‘liq pishirilgan holda va me’yorda (kuniga 1 donadan oshirmasdan) iste’mol qilishni tavsiya etadi. Bolalarga esa vrach maslahati bilan, ma’lum yoshdan so‘ng asta-sekin kiritib borish ma’qul.
“Zamin”ni Telegramʻda oʻqing!
