Ko‘z qichishishi turli sabablarga ko‘ra yuzaga keladi va uning davosi ham manbaga bog‘liq bo‘ladi. Ayrim holatlarda uy sharoitida muammoni yengish mumkin, ba’zilarida esa mutaxassisga murojaat qilish talab etiladi.
Mutaxassislar ta’kidlashicha, allergiya sababli qichishishda allergenlardan uzoq turish va antigistamin dori vositalarini qabul qilish foyda beradi. Shuningdek, ko‘z gigiyenasiga amal qilish, qo‘lni yuvmasdan ko‘zga tegmaslik va sun’iy ko‘z yoshi tomchilaridan foydalanish tavsiya etiladi.
Ko‘zni charchashdan asrash uchun kompyuter ekraniga uzoq tikilmaslik, har 20 daqiqada ko‘zni dam oldirish muhim. To‘g‘ri ovqatlanish, xususan A vitamini va omega-3 moddalariga boy mahsulotlar iste’mol qilish ham ko‘z salomatligini yaxshilaydi.
Shuningdek, xonada havoni nam saqlash, shamol va changdan himoyalanish qichishishning oldini oladi. Agar muammo uzoq davom etsa yoki ko‘rish qobiliyati pasaysa, albatta oftalmolog maslahati zarur.
