Ўзбекистон дунёдаги энг арзон мамлакатлар рейтингига кирди!

Жаҳондаги шаҳарлар ва мамлакатлар тўғрисида кенг қамровли маълумотларни тақдим этувчи Numbeo портали 2025 йил учун глобал яшаш даражаси рейтингини эълон қилди. Бу рейтингда дунёнинг 139 мамлакатида яшаш қанчалик қиммат экани акс эттирилган бўлиб, Ўзбекистон ушбу рўйхатда энг арзон мамлакатлар қаторидан жой олди.

Мутахассислар рейтингни тузишда турли мамлакатларда кундалик ҳаёт учун зарур бўлган маҳсулотлар ва хизматлар нархларини таҳлил қилишди. Хусусан, ижара тўловлари, коммунал хизматлар, транспорт харажатлари, ресторан ва озиқ-овқат нархлари ҳамда аҳолининг харид қобилияти каби омиллар ҳисобга олинган. Ҳар бир мамлакатдаги яшаш харажатлари Нью-Йорк шаҳрининг турмуш даражаси билан таққосланган ҳолда баҳоланди.

Рейтинг натижаларига кўра, Ўзбекистон 24,2 балл тўплаб, 139 мамлакат ичида 127-ўринни эгаллади ва дунёдаги энг арзон ҳаёт кечириш мумкин бўлган мамлакатлар қаторига киритилди. Бу Ўзбекистон аҳолиси учун ҳаёт кечириш харажатлари бошқа давлатларга нисбатан анча паст эканини англатади.

Шунингдек, қўшни давлатлар ҳам ушбу рейтингда ўз ўринларини эгаллашди. Масалан, Россия яшаш қиймати паст бўлган мамлакатлар орасида 132-ўринга жойлашган бўлса, Беларус 123, Қирғизистон 121, Қозоғистон 114, Арманистон эса 63-ўринда қайд этилди. Аммо Тожикистон ва Туркманистон турли сабабларга кўра ушбу рейтингга киритилмади.

Рейтингда яшаш учун энг қиммат давлатлар сифатида АҚШ Виржиния ороллари, Швейцария, Исландия, Баҳама ороллари ва Сингапур тилга олинган бўлса, энг арзон мамлакатлар сифатида Афғонистон, Ҳиндистон, Миср, Ливия ва Покистон кўрсатилган.

Мазкур рейтинг натижалари Ўзбекистонда яшаш арзон эканлигини тасдиқлаб, мамлакатдаги турмуш шароитлари хорижий туристлар ва инвесторларни жалб қилиш имкониятларини янада ошириши мумкин. Шу билан бирга, аҳолининг даромадлари ва харид қобилиятини ошириш бўйича саъй-ҳаракатларни давом эттириш муҳимлиги ҳам эътироф этилади.

Халқаро рейтинглар доимо аҳолининг фаровонлиги ва давлат ривожланишининг муҳим кўрсаткичларидан бири бўлиб келган. Ушбу рейтингдаги натижалар Ўзбекистоннинг бу борадаги халқаро мавқеини яна бир бор кўрсатиб берди.